【冬天緊係去打邊爐!】東京暖笠笠極品火鍋4選

天氣終於開始轉涼,又係時候大家圍埋一齊烚吓烚吓!打邊爐嘅配料來來去去都離唔開豬牛雞海鮮同蔬菜,日本都唔例外。但明明大家用嘅配料都係咁上下,整出嚟嘅味道同風味就差非常多,以下呢幾間位於東京嘅餐廳都可以食到無論賣相定味道都非常出眾嘅鍋物料理,下次有機會記得去食返次同香港完全唔同風格嘅Shabushabu!
 
1.はながこい 青山本店@渋谷
 
 
嚟到呢間「Hanagakoi」一定係食超豪華嘅海膽鍋「うにしゃぶ(¥2,100)」!海膽鍋個湯底用咗海膽同蝦頭熬製,成鍋都呈現勁誘人嘅金黃色,未食都已經流哂口水!
 
見到個鍋上枱記住千祈唔好過於衝動就咁將啲海膽放哂入個鍋度淥,就咁放入去會令到啲海膽溶到渣都冇得剩。店員會好細心咁教你正確食法,會話畀你聽要用魚夾住海膽同其他配菜同要淥幾多秒,唔識聽到唔緊要,跟住做就得。
 
唔單止海膽鍋係極品,呢度嘅串燒都好正,如果幾個人一齊去不妨叫多幾款試吓。
 
鍾意呢度嘅另一大原因係呢度有2個人都可以入去坐嘅個室,可以慢慢食慢慢傾。
 
はながこい 渋谷本店
地址:東京都渋谷区渋谷1-1-8 ダイヤモンドビル B1F
電話:03-3498-3228
營業時間:11:30~14:00、17:00~23:00
休息日:不定休
消費預算:¥1,480~
 
==========================
2. しゃぶ 与志@新宿
 
 
打邊爐一定唔少得牛肉!呢一間叫「与志」嘅餐廳已經開咗30年,最出名係絕品A5黑毛霜降和牛,menu入面都有唔少日本國產和牛可以揀,全部嘅油脂都分佈得好平均,放入特製上湯輕輕燙幾秒就食得,牛肉香充滿整個口,和牛嘅威力真係唔講得笑!
 
最多人揀嘅係又有和牛又有松葉蟹食嘅「カニ・国産牛しゃぶしゃぶ(¥5,400/100g)」,蟹腳勁大條,口感紮實,夠哂新鮮。
 
室內格局係咪同香港嗰啲好唔一樣呢!坐都坐得舒服過人!
 
歌舞伎町 しゃぶ与志
地址:東京都新宿区歌舞伎町1-2-13 新光ビル1F
電話:03-3207-3707
營業時間:17:00 ~ L.O.PM22:30
休息日:無
消費預算:¥3,150~
 
==========================
3. かに猿@葛西
 
 
講到食蟹大家一定會諗起蟹道樂,但其實坊間仲多可以食到蟹鍋物嘅店舖都好正,好似呢間「Kani猿」,大部份食材都由北海道直送過嚟,一食就知道肯定唔係雪藏貨色,勁新鮮!
 
當中最受歡迎嘅係「かにしゃぶ(¥3,800/人)」,一年四季都可以食到,食嘅時候記得點埋店家自製嘅醋汁,會更加突出蟹嘅鮮甜。不過喺呢度食鍋物要最少早一日預約,唔識日文的話可以搵酒店幫手。
 
雖然呢個可樂餅同個鍋完全冇關,但都係必點之選!一般嘅可樂餅都會將所有材料切碎哂搓成球狀再拎去炸,不過呢個就好驚喜,一撩開竟然有一大條蟹肉走出嚟,勁足料!
 
香港肥牛好多都係用機刨,但呢度仲係用人手塊一塊咁切落嚟,每塊厚度都切得好平均同好薄。
 
Kani猿一共有2層,一樓以counter位同一般座位為主,而2樓就以榻榻米坐位為主,同時可以容納到好多人,減少排隊等嘅時間。
 
かに猿
地址:東京都江戸川区中葛西2-17-9
電話:03-3869-8777
營業時間:星期二至五 11:30~14:00、17:00~21:30;星期六、日及公眾假期 11:30~21:30
休息日:星期一
消費預算:¥1,800~
 
==========================
4. 豚組 しゃぶ庵@六本木
 
 
日本鍋物太好味份量又唔係太多,男仔大食少少實會食到到喉唔到肺,所以嗰啲有得食鍋物放題嘅餐廳對佢地嚟講簡直係天堂!特別係呢間叫「豚組 Shabu庵」嘅豚肉火鍋店,只要畀¥4,600就可以一次過喪食來自岩手、千葉同三重嘅頂級豚肉,仲可以任食蔬菜,到最後仲有個甜品送,真係食到要捧住個肚走!
 
店方自定製嘅沾醬好成功地將豚肉香迫咗出嚟,而除咗點醬之外,亦可以試吓就咁放幾粒岩鹽上去食,試吓豚肉最根本嘅味道。
 
個set仲會附送一個豚骨麵,記住留返啲位試吓啊。
 
店入面嘅個室私隱度高,同另一半去啱哂!
 
豚組 しゃぶ庵
地址:東京都港区六本木7-5-11 2F
電話:03-5770-4821
營業時間:星期一至五 11:00~14:00、18:00~23:00;星期六、日及公眾假期 11:30~14:00、17:00~22:00
休息日:無
消費預算:¥3,700~
 
 
最後要提提大家,喺日本好多時食火鍋都要2位起,如果店方有要求你最少要叫2人份量,就唔好幾個人夾硬要share一個鍋,好肉酸㗎!