兼六園

今日天氣一樣好好,而一訓醒就已經嚟到出名古色古香嘅目的地--金澤Kanazawa!一落船就見到金澤嘅吉祥物
 
 
好多加賀友禪大使歡迎我地❁´▽`❁
 
 
如果你去過京都體驗著和服,應該都會聽過「京友禪」,而「加賀友禪」,其實都係金澤一種和服上嘅染色技術。「加賀友禪」傳統歷史悠久,想完成一匹華麗細膩嘅友禪絲料,要經過畫圖、上糊、上色、蒸製、洗糊等繁複過程先可以完成,難怪會被指定為國家高級工藝品。當然,除咗和服之外,其實都仲有好多加賀友禪嘅相關製品,例如手巾、絲巾等...不過我地今日嘅主題並唔係「加賀友禪」,而係要親親大自然,出發去【兼六園】!
 
 
兼六園位於金澤市中心,是日本三大名園之一。之所以叫兼六園,全因佢備齊「六勝」,即六種景觀元素(宏大、幽邃、人力、蒼古、水泉、遠景),而且春夏秋冬各有特色。
 
 
好在都唔算好多人,唔洗點排隊買飛。去到入口處就會見到個指示牌~我地決定去咗兼六園最具代表性嘅景點「ことじ燈籠」(徽軫燈籠:徽軫嘅日文發音解作琴柱)先。
 
 
石燈籠其實係日式庭園嘅代表景物,除咗照明其實亦有警示功能。傳統造形由上至下以寶珠、笠、火袋、中台、竿、Base等6個部分組成,造型繁複仲有好多唔同嘅款。而呢個「ことじ燈籠」就係兼六園最具代表性嘅景物,皆因其腳狀如琴柱,所以叫琴柱燈籠,附近嘅呢條「虹橋」亦配合又名「琴橋」。
 
 
【霞之池】係園內最大嘅池塘,與燈籠、琴橋以及隔離棵老楓樹融為一體,構成呢福咁靚嘅景色。
 
 
所以景點自然有好多人...´-ι_-`要輪流影相也是常識吧~
 
 
 
右邊嘅島仔叫蓬莱島/龜甲島,貫徹建園嘅神仙思想:將大池比擬成大海,海中有島,而長生不老嘅神仙就住喺呢個島上,象徵長生不老。
 
 
巨松會横生,所以要用好多支架去支撑同保護佢哋,相當用心良苦。而到冬天仲有機會見到「雪吊り」,避免古樹比大雪壓親。
 
 
兼六園六勝之一「眺望」,係呢個瞭望台望出去可以見到成個金澤市區。
 
 
 
 
【旭櫻】係日本國內最老嘅二代山櫻花大樹,如果春天嚟睇櫻花一定好靚。
 
 
之所以叫【雁行橋】,因為採用咗11塊赤戶室石做成雁隊飛行嘅效果。但偏偏好多人覺得石頭嘅形狀似龜甲多啲,所以又名為「龜甲橋」。傳說行過呢條橋就可以長命百歲,但未知係咪因為太多人行,而家已經嚴重磨損,大家亦只能遠觀不可褻玩了。
 
 
【地藏堂】園內嘅守護神~
 
 
【兼六園熊谷櫻】都係果句,好可惜無得賞櫻;_; 其實不論行到去邊都綠意盎然,如果櫻花盛開或是大雪紛飛過陣黎,一定仲更加靚!
 
 
超推薦食呢到嘅雪糕!
 
 
綠茶味真心無得輸~
 
 
【辰巳用水】因為1631年曾經發生大火,所以商人板屋兵四郎從犀川上游引水,為金澤城防火之用,稱之辰巳用水,園內曲水小溪既水源其實都係嚟自辰巳用水。
 
 
【日本武尊雕像】為紀念喺1877年西南戰爭中陣亡嘅石川縣軍人而建立,係日本最早嘅紀念銅像。
 
 
庭院之大真心有排行,行到攰可以坐低休息下。
 
 
【石川門】呢座石川橋connect住金澤城同兼六園,亦係好多遊客影相嘅地方。
 
 
只可惜因為時間嘅關係,我地並無參觀埋金澤城。不過我又唔覺得遺憾嘅,當係下次再黎金澤嘅理由仲好!:P
 
開放時間:7:00~18:00(10/16~2月末8:00~17:00)(年中無休)
入場費: 大人300日元、6~18歲100日元、65歲以上免費
地址:日本石川縣金澤市丸之內1番1號
電話:076-2343800
遊戲截止日期: 
2016年11月30日