全球首家米芝蓮1星級拉麵店 真係咁好食?

唔知大家有冇留意,今年嘅《米芝蓮指南》上面,首次出現咗得到星級評分嘅拉麵店呢?
依間全世界第一間嘅「摘星拉麵店」「Japanese Soba Noodles蔦」就位於東京嘅巢鴨(巢鴨站出嚟行3分鐘就到)。
雖然「蔦」好似冇咩香港人識,但係其實佢係得到星級殊榮之前,就已經連續兩年得到「東京拉麵 of the Year」( 東京ラーメンオブザイヤー),2014年亦都得到「食ボログ」嘅「最佳拉麵獎」,係日本人氣高到加零一!
好啦,咁到底「蔦」粒米芝蓮星星係名副其實定係名過其實呢?一齊嚟睇下啦~
 
 
喺某個風和日麗嘅早上9點,我嚟到巢鴨嘅「蔦」……
唔好以為我晨早流流食拉麵當早餐呀,「蔦」嘅營業時間係咁早上11點開始㗎!
咁點解我要咁早嚟呢?因為要食星級拉麵就要拎整!理!券!拎唔到籌就沙唷啦啦~
 
我朋友晨咁早8點半嚟到,諗完幾點嘅整理券都實拎到啦!結果……8點半嚟到最早都只係拎到下晏1點嘅整理券……聽講如果要拎到11點嘅整理券就要6點幾嚟拎……(好似係……)
 
比1000yen訂金先可以換整理券㗎!我拎到嘅係深藍色嘅下晝1點……留意下晏4點左右所有整理券就會派晒,唔好慢吞吞啦~
 
12點半左右,我又返到嚟依到……開咗門啦!感覺完全唔似拉麵店,而係高級壽司店嘅感覺~
 
因為有整理券嘅關係,都唔洗等太耐,半個鐘之內就入到去~
 
一入到去,完全feel到大家都好專心咁嘆緊個拉麵!完全冇人出一粒聲!
 
咁大家入去之後就買咗飛先啦~
左上角有相個兩個就係最出名嘅餐單~左邊「燒豚味玉醬油」係有味溏心蛋+叉燒+醬油拉麵;右邊「燒豚味玉塩」係溏心蛋+叉燒+鹽味拉麵~
 
「蔦」嘅自家製拉麵係用日本嘅4種小麥配合來自蒙古嘅天然鹼水做嘅~醬油拉麵係用幾種日本國內嘅唔同醬油整嘅;鹽味拉麵就係用咗大量海產例如蜆、魚等等整嘅~兩個湯嘅口味都好清爽,同我地食開嘅勁濃豬骨/魚介湯底好唔同㗎~
 
我禁錯咗「燒豚醬油Soba」,其實我想要「燒豚味玉醬油」……算啦我禁返「味玉」(有味溏心蛋)都一樣錢~另外我仲加咗詼菜㖭!(100yen唔算貴啦~)
 
到啦~~~~~點呀係咪好豐富呢~~等等先,右邊個碗係咩嚟㗎?冇錯就係豬肉飯啦!一碗拉麵加細細碗豬肉飯就係依到嘅人氣點餐~
 
食咗個拉麵先~麵條算幼身,好彈牙,重強味,不過我就清楚咁聞到來自蒙古嘅鹼水味……而我冇特別喜歡依陣味……
 
 
叉燒!依塊叉燒係我喺日本依過最數一數二嘅叉燒!(係呀一蘭同無敵家都完全比不唔上!)
依塊叉燒採用咗豬肩胛肉嘅部位,咬落去好有彈性,feel到塊肉非常新鮮,味道好清新,一啲肥膩嘅感覺都冇!!!!!!!!!我覺得成碗拉麵最好食就係依塊叉燒!
 
好大碌筍啊!超過1cmX1cm粗!入面索晒啲湯汁~可惜咬落去有少少根,係咪粗就一定會有依個問題?
 
天啊!依個又係我食過數一數二嘅有味溏心蛋(味玉)~蛋白部分有啲甜甜香香嘅醬油味,質地好軟唔會實的;
蛋黃味好香好濃,蛋黃最外個層係溏心,中間就係流心,非常完美~~早知要兩隻啦~~~~
 
至於個湯呢,我覺得個重點係在於你到底鐘唔鐘意食黑松露囉……
如果你鐘意食嘅話,我會強力推介你嚟食!
但如果你唔鐘意食黑松露,姐係好似我咁,咁你可能會覺得個湯都係麻麻地,仲可能會唔識貨地覺得啲黑松露油油得滯㖭ww
不過由於依個麵嘅配料實在太好食,加上最平只係需要850yen(姐係60蚊左右)就可以食到依碗全球首間米芝蓮星級拉麵,所以真係一去無妨~
 
不過大家要留意,佢地逢星期三休息!小心唔好摸門釘啦~
 
 
 

回覆

ccyuccyu的圖片

請問一個人可否攞兩張券?因為幫旅伴攞埋
唔該哂??

mika的圖片
答案係……唔可以嘅!!!!!!!!
(雖然我唔排除你隔一輪再去拎券,店員會唔會有機會唔記得你已經拎過……但係我係唔敢搏嘅www)