【入浴劑大比拼!】趣怪造型功能乜都有

天氣開始轉涼,放工返到屋企真係好想慢慢浸個浴輕鬆一下,不過冇入浴劑硬係覺得差啲差啲,真係好羨慕住喺日本嘅人可以隨時隨地都買到有唔同功能同造型嘅入浴劑,好似以下喺Loft都會搵得到嘅呢幾款,咁得意同好用,買咗返嚟做手信都唔係好捨得送畀人添......
 
 
1. 秘伝湯 冷え症神経痛 ¥378
 
 
睇個包裝就覺得呢包入浴劑好似好有效,專治手腳冰冷同神經痛,有助促進血氣運行,浸完之後包係一日嘅疲勞盡消!
 
===========================
2. 大和当帰の湯 ¥150
 
 
呢個大和之湯個包裝勁懷舊,完全係因為個包裝先會拎上手睇。一望發現呢包原來係勁野嚟喎!首先佢加入咗藥草成份,係醫藥部外品,即係已經証明咗係有藥理作用。將入浴劑倒入水啲水就即刻變成奶白色,個人坐咗入去浸一陣就已經覺得皮膚好滑溜溜,效果比預期之中好!
 
同系列仲有紅色包裝,倒入水就會變黃綠色,一set咁買嚟做手信都幾靚仔。
 
===========================
3. 爆汗湯 ホットジンジャーの香り ¥260
 
 
呢個爆汗湯 應該有唔少人聽過,齋聽個名都知浸緊嘅時侯會勁流汗,不過最得意反而係倒入浴劑入水嗰一刻,啲炭酸聲勁到好似倒咗支汽水入浴缸咁!效果方面,好似冇包裝講到咁勁,流汗程度未算好誇張,不過浸完成個人都會暖笠笠。
 
===========================
4.脂肪分解酵素配合入浴 ¥216
 
 
喺日本成日食食食,見到呢包野仲唔衝去買返包,最好浸一次就溶哂身上脂肪,咁聽日先有quota再去喪食嘛!呢包入浴劑入面加咗岩鹽、唐辛子同脂霉,所以可以同時做到保濕、流汗同分解脂肪嘅效果,仲有勁香嘅橙味,真係有啲似浸咗喺橙汁入面~
 
紅色版係MORE HOT,同款藍色版就冇特別寫明,而味道就係西柚味。
 
===========================
5. ざらざら黒ずみ分解入浴 ¥216
 
 
如果唔係見到呢個黑頭分解入浴劑都唔知原想身上嘅黑頭都可以清清佢!包裝話用咗呢包入浴劑,即使唔使起勢咁捽,身上嘅死皮同黑頭都可以輕易咁被水入面嘅炭酸清走。咁又幾好喎,舒舒服服浸喺度唔使點郁都可以變乾淨,咁哂至懶嘅我!
 
===========================
6. 温泉旅行 白浜 ¥108
 
 
有冇諗過唔使¥200就可以將日本名溫泉帶返去自已浴缸?呢個倒出嚟係藍藍地色嘅白浜溫泉入浴劑完美重現當地溫泉水水色同香味,合埋對眼真係好似返咗日本啊。呢個最啱買畀朋友做手信,等佢地就算冇假冇錢去旅行都可以輕輕感受吓浸溫泉嘅樂趣。
 
整個系刊有成12款咁多,功能都大同小異,最唔一樣就係隻隻都有唔同嘅顏色同氣味。
 
===========================
7. うんこ入浴剤 ¥411
 
 
呢個大便入浴劑嘅造型真係贏哂!一掉入水,舊大便就會隨即溶化,仲會瞬間令啲水變咗做啡黃色,勁似去完廁所未沖廁嘅顏色,要走入去浸真係要鼓起小小勇氣。不過放心,啲水唔會有一陣大便味,而係好香嘅玫瑰花味,浸完成個人仲好似幾乾淨,都幾好玩!
 
唔單止大便,仲有呢個胸部嘅造型都超爆!呢隻會令啲水變成奶白色,有好香嘅牛奶味。