偽現充的六本木萬聖節夜蒲實錄!

利申:本身拍呢條片係想俾自己嘅朋友睇下六本木Halloween係癲成點,好似個人遊記咁分享。不過後來覺得有啲畫面都幾精彩,所以就決定擺上嚟畀大家睇吓~敬請原諒片段後面我都醉醉地,感覺唔係好pro 不過都俾大家睇到最真實嘅一面呀 
 
話說我咁大個女,終於有機會嚟日本過萬聖節喇!每年都坐喺個mon前面睇日本人玩得有幾癲...今年終於有得親身感受~我聽啲日本朋友話東京最好玩都係六本木同涉谷,涉谷我地就萬聖節正日當晚同大家做咗live啦,而家就俾大家睇下萬聖節前夕六本木嘅盛況啦!
 
其實六本木就好似香港蘭桂坊咁,附近有好多office,而啲人放工就會來飲酒,所以開咗好多club同bar,亦都吸引好多外國人嚟嘅。呢度嘅夜生活真係幾精彩㗎!
 
入club之前我就去咗大街感受下氣氛同埋觀賞下大家嘅萬聖節打扮!唯一可以肯定嘅係,雖然偶爾都有小丑女出沒,但都真係少香港好多!㗎妹都係中意扮下可愛性感貓貓狗狗多~
 
六本木最墟冚嘅club其中一間就係呢間西麻布a-life,上次開幕嘅時候都有同大家報導過,今次嚟就比上次多更多人,重要全場都有作萬聖節打扮,睇得出萬聖節啲日本人真係玩得好癲!而且開幕嚟個陣就外國人居多,但今次嚟就真係好多好多日本人~大家著咗costume好似變咗個人咁,跳舞都大膽咗!
 
其實今年萬聖節係日本都引嚟好多議題,有好多日本人話覺得班出嚟癲嘅年青人為東京增添咗好多麻煩,我仲以為今年會收斂啲冇咁癲,但原來一樣好好氣氛~中意感受熱鬧氣氛嘅朋友不妨考慮下親身嚟日本過Halloween,都真係一個難忘嘅回憶呀!(起碼唔係蘭桂坊個隻,迫到行唔到又辛苦嘅熱鬧先囉)