話說近日香港加X健身突然執笠，引來唔少苦主追討會費，小弟喺日本生活咗一段日子，又想試下比人拉下筋做下運動，所以join咗屋企(池袋)附近一間健身室，今次就介紹下比大家知，順便測試下會唔會有教練幫我拉筋
我就去咗呢間健身室：Anytime Fitness，話明Anytime，賣點就係24小時都可以去做gym！
有時夜闌人靜想去舉下鐵，24小時真係好方便！我都係因為呢個賣點先join！
收費計劃
咁講講收費先啦，間健身室得一個plan，就係月費：8424Yen已連稅 (即係港幣$630蚊左右)。入會手續好簡單，只要拎埋passport上去，填返啲基本資料就可以。第一次入會就交2個月會費， 另外仲有條電子key盛惠5140yen(入門口用)。
如果租埋locker就每個月1080yen，其實加加埋埋個價比我喺香港玩嘅係貴啲，不過近屋企又24小時可以玩呢個賣點吸引咗我，所以決定join嚟玩下。
環境及健身器材
老實講環境就唔算好豪華，但一般應該有嘅跑步機、健身器材、健身球同啞鈴等等都好齊全。
我自己就鍾意深夜或返工前去做，唔會好多人，一般都唔駛等機做，反而收工時間就會多啲。
做完gym當然沖個靚涼啦要，呢間健身室都有，不過入面就冇洗頭水同梘液囉…有些少麻煩。
有冇教練sell堂幫你拉筋？
對唔住，呢度係冇人會幫你拉筋的(唔知點解有啲失望…)。喺香港玩，其實都唔係好鍾意有人sell堂，雖然你唔理佢都得，但有時都有面色睇下。呢間健身室就冇呢個問題。
夜晚7點打後就冇職員係度，而且就算有，佢地都唔多理你，反而你唔識用啲機，都可以主動去請教佢。對於我呢類毒男，都係跟網上教學去做，所人冇人煩我就啱晒。
用後感：
其實如果你喺香港有玩開gym，都應該聽過Anytime Fitness呢個名，其實同我喺日本玩個間係同一集團，所以拎住一條key，係香港都入到(但香港分店地點對自己嚟講唔係好就腳)。係日本玩咗呢間健身室一個月，雖然收費有少少貴，不過我去開池袋分店，環境亦唔算好靚，但使用人數唔係好多（可能我成日深夜先去），啲機都算齊，所以一個人靜靜咁玩真係好唔錯！
Anytime Fitness資料:
地址：東京都豊島区池袋2-40-13 池袋デュープレックスビズ 2F
收費：月費 8424Yen已連稅
官方網站 ：大家可以去呢個網址睇下有咩分店。
About Post Author
