【便利店速報】幾飽都要食嘅激讚甜品!

去日本玩,唔好話畀我聽你未入過便利店買野食!
 
日本基本上有7-11、Lawson、Family Mart、MINISTOP呢幾間便利店,入親去都好似尋寶咁,唔單止有熱食、便當去解決一日三餐,就連佢地嘅甜品都超級好味,每次都肯定會掃幾款走,返到酒店攤哂出嚟好似食甜品放題咁,真係超幸福超滿足!
 
咁多甜品入面你最鍾意食嘅又係邊幾款,下面呢啲你又有冇試過呢~
 
 
1. ミルクたっぷり とろりんシュー@7-11 ¥100
 
 
呢個個感覺好似食緊個泡芙咁,不過入面個餡更加香濃,有超濃郁嘅牛奶味!一打開個包裝就聞到一陣好香嘅餅皮味,搣開出面,入面嘅牛奶Cream即刻流哂出嚟!最鐘意呢個甜品個皮夠薄又唔會太甜,啲餡又夠多,每一啖都充滿住勁滑溜牛奶Cream,成件事真係好夾好perfect。
 
好鍾意啲cream唔會太杰身,個感覺冇咁濟。
 
============================
2.ちょこくりぃむどら@7-11 ¥150
 
 
呢個極之其貌不揚嘅黑媽媽銅鑼燒其實係好野嚟㗎,由內到外都係由朱古力整成,鐘意食朱古力嘅一定覺得呢個冇得頂!個餡係朱古力cream,入面仲加咗啲一粒粒嘅朱古力粒,真係一啖就食到3重口感啊!
 
見唔見到啲朱古力粒!唔係得一兩粒咁行㗎!
 
============================
3. おもちのようなチーズケーキ @ CircleK ¥150
 
 
呢個寫到明叫好似年糕咁煙韌嘅芝士蛋糕,喺未食之前都想似到個口感應該會有啲似糯米糍,果然,一拮落舊芝士蛋糕度就覺得好軟熟!個芝士用咗忌廉芝士、芝士醬同酸忌廉去整,所以味道會甜中帶酸加少少咸,用嚟送啤酒飲好正~
 
我比較鍾意將佢攤返暖先食,入面溶溶哋口感更加軟熟。
 
============================
4. まるごと栗大福@Lawson ¥150
 
 
由於好鍾意食啲煙煙韌韌嘅野,所以見到呢個大福又認唔住買咗啦。呢個大福拎上手好軟冧冧,佢個皮做得好軟熟,唔單止口感,手感都好好!入面有用咗北海道產嘅紅豆整嘅紅豆蓉,最中心就包住咗一大粒栗子,整體賣相同味道一啲都唔輸出面舖頭食到嘅質素!
 
啲紅豆蓉做到好幼細,用條脷一頂就會化開。
 
============================
5. もち食感ロール@Lawson ¥295
 
 
成條卷蛋都只係¥295,同朋友一齊share每人都仲食到幾件,好抵食!唔好以為咁平用料就會是是但但,呢氣卷蛋入面用咗來自阿蘇嘅牛奶整成,同香港本土卷蛋入面嘅cream味道完全唔一樣,甜甜地帶有好香嘅牛奶味,同埋佢地落手勁重,中間嗰堆cream係多到佔咗成個卷蛋一半面積!
 
睇唔睇到!啲cream勁幼滑,個蛋糕勁鬆軟,宵夜食唔哂留返朝早食依然好好味!
 
============================
6. 抹茶が薫る~クレームショコラ@Family Mart ¥220
 
 
嚟得日本,又冇理由唔食設個抹茶甜品!呢個抹茶朱古力杯個樣好似好高級,應該都唔會難食得去邊。一打開,真係有啲料到喎!個面睇落勁滑,未放入口視覺上已經覺得好享受啦!呢個甜品用咗京都產嘅宇治抹茶同白朱古力作為主要原材料,所以一食就食到好濃嘅抹茶味,食到尾仲有少少回甘添。
 
個抹茶杯真係好幼滑,一入口就會化口,抹茶嘅香唔淨上溶喺口,仲溶埋入心啊!
 
 
唔單止以上嗰6個,便利店其實仲有好多其他超好味嘅甜品,老土啲講句,真係就算幾飽都要食返個為一整天劃上一個完美嘅句號~