你可能不知道 歌喉超好的日本演員們

現時主演NHK晨間劇《當家姐姐》嘅24歲女星高畑充希其實歌喉非常了得。佢當年係參加「山口百惠音樂劇」甄選而出道成為演員，亦有一路參演舞台劇同音樂劇，更曾被黑木瞳評價為「背負日本音樂劇界的逸才」！其實佢曾經以「みつき」嘅身份出咗幾首歌，不過當年就無紅到，反而係因為喺電視上面（包括廣告同日劇）一展歌喉過後大家先至知佢原來唱歌好叻叻㗎！

同歌手木村Kaela結咗婚嘅男演員瑛太好少係鏡頭前唱歌，不過就因為劇情需要，曾經喺《最完美的離婚》同《Lucky 7》中初試啼聲。只係短短一兩句嘅歌聲已經足夠聽得出瑛太唱歌真係好好聽！（《最完美的離婚》嗰一幕嘅震撼尤其令人難忘）

才女杏又識演戲、又有模特兒身材、又熟讀歷史、又有個好老公，真係超級羨煞旁人！雖然唔係歌手，但佢唱歌就好鬼叻，仲識得自彈自唱，曾經上節目唱TOKIO嘅歌俾大家讚到話想換走主唱長瀨智也添呀XD

啱啱公佈結婚無耐嘅榮倉奈奈主演過多套日劇，大家對佢嘅印象都係一個可愛嘅小妹妹。其實佢唱歌又好好鬼勁。當年曾經係電視節目表演用日本傳統樂器三味線自彈自唱經典日謠「淚光閃閃」。唔講唔知，鹿兒島出生嘅Nana其實拎過2001年度全國三味線大會「全國協會少女部最高獎」㗎。

講到三味線，又點可以唔提桐谷健太？相信就算未睇過佢嘅日劇，都有見過佢為日本電訊公司au拍嘅桃太郎系列廣告！當中佢為廣告彈住三味線嘅主題曲仲係日本大熱，成為K房必唱嘅金曲！我都幾鍾意佢man man哋、粗獷嘅唱腔！

綾瀬遙
國民女優綾瀨遙其實曾經出過四隻CD～佢唱歌把聲幾可愛幾治癒㗎！佢唱嘅歌主要都係慢慢地嘅歌，但就好多網民覺得好溫柔同舒服。

好多巴打嘅女神長澤正美就曾經係日劇《年輕人們2014》嘅其中一幕，攞起把結他自彈自唱英文歌、Lisa Loeb嘅「Stay（I missed you）」。佢自己仲話覺得全部係英文歌詞好難，所以苦練咗好耐！而原唱Lisa Loeb都有喺Twitter讚佢呢～

滿島光
曾經係idol組合Folder5成員嘅滿島光，組合仲曾經唱過海賊王主題曲「Believe」，歌喉有返咁上下都好正常！走上演員之路嘅佢其實已經好少出嚟唱歌，但就次次唱親都會引起話題～所以都而家都會有廣告商搵佢唱歌！

可能大家對水着女星篠崎愛嘅印象就只有佢嘅身材…但其實佢唱歌都好犀利㗎！佢就曾經係電視節目表演連唱高音歌串燒，成為話題！後來佢仲俾廣告商青睞叫佢主唱廣告歌添！

呢個就私心擺嘅…其實結衣BB都曾經出過幾首單曲㗎！同綾瀨遙一樣，都係唱偏慢嘅歌為主。雖然佢嘅歌喉唔係特別算係令人驚艷，但其實啲歌幾好聽幾舒服，同埋結衣BB唱歌把聲係真心kawaii㗎呢！