【住邊好】歎住去露營你試過未?

前幾日介紹過富士山山腳附近有咩玩,如果即日來回要玩哂鳴沢村4大必玩體驗嫌太趕想Hea多日,極力推介大家去距離只有大概20分鐘車程嘅「星のや富士」。
 
呢度最啱啲想去露營但又驚砌唔掂個帳篷、又驚夜晚有蛇虫鼠蟻瞓得唔好、又驚會冇啖好食嘅初心者,因為呢度唔單止有勁舒服嘅房間,又有專人為你炮製美食,最重要嘅係呢度有多項戶外露營設備,日頭可以四圍探索自然景色,入夜後又可以舒舒服服喺戶外觀星,簡直就係歎住去露營,越夜越精彩!
 
1. 超舒適住處環境!
去camp一大顧慮就係瞓教環境,呢度嘅房間非常舒服,又有獨立衛浴設備,最正就係每間房都有會露台望正河口湖湖景,好彩嘅話仲會睇到富士山全景添啊!仲有,有無留意到呢度係冇電視㗎,咁大家就唔會浪費時間去睇電視啦。
 
到啦!呢間屋仔就係Check-in嘅地方。
 
工作人員會將望遠鏡啊、電筒仔啊等等一陣入住後可能用得著嘅野入落袋仔度交俾你。
 
收好野之後就出發去住嘅地方啦。因為住宿唔係喺正Check-in counter隔離,所以佢地會有專車接載你去到房門口。
 
呢啲一個個四方盒仔就係夜晚會住嘅地方啦。
 

房間好舒服,又有獨立衛浴,真係完全顛覆去camp嘅印象。
 
 
室外有個小露台,有梳化仔俾你歎住睇湖景。見唔見到左手邊有個迷之鐵盒?原來係酒店為咗另大家覺得自己去緊camp,特登設置嘅超迷你營火嚟㗎!
 
夜晚開咗就係咁樣㗎啦。
 
2. 融入大自然嘅露營設施
走出房間行10分鐘倒就會見到間好舒服嘅cafe同埋Cloud Terrence,有哂露天椅、營火區等等,每日都會舉辦唔同活動,下午3點到5點更加會準備綿花糖及香蕉等俾大家喺營火即場燒嚟食添。仲有記住玩埋個空中帳篷,夜晚喺呢度睇星真係好靚!在場仲有戶外專家駐場,即使遇到啲咩突發事件都唔使怕啦。
 
Cloud Terrence範圍及同大自然融為一體嘅cafe
室外嘅設施係咪好有camping feel呢
 
去camp又點少得camp fire?每日喺Cloud Terrence都會舉辦唔同嘅活動,下午3點到5點更加會準備綿花糖及香蕉等俾大家燒。
 
而入夜之後呢度就會變身成為「焚き火BAR」提供酒精飲品。
 
呢個就係好多人慕名而去嘅空中帳篷,冬天嘅時候坐喺營火隔離暖笠笠咁觀星真係好浪漫好享受。
 
3. 專人炮製BBQ美食
有咁靚嘅大自然又點可以冇美食相伴?喺呢度大家可以舒舒服服咁享用由大廚親手炮製嘅BBQ美食,除咗可以喺室外享用之外,亦可以喺室內用餐區或請工作人員送返房間享用,有和牛、豚肉及比較少見嘅鹿肉,好似樣樣都好好味,應該㨂咩好!
室內用餐區環境好闊落,廚師喺正餐廳炮製料理,睇住佢燒真係越睇越餓。
 
晚餐亦可以喺Cloud Kitchen享用特製嘅烤箱料理,喺室外用餐特別有氣氛!
 
唔好以為喺房只可以食啲比較簡單嘅料理,喺房入面竟然連熱辣辣嘅鍋物都可以品嚐到,食材仲要係當地新鮮鹿肉!
 
4.多項特備富士山相關體驗
其實要玩哂上面咁多樣野已經冇咩時間剩,不過如過都係想再充實啲嘅話可以參加吓官方活動,有得遊湖、體驗吓製作當地特產,都幾特別幾好玩!
 
喺朝早可以參加游湖
上午7時至8時,收費大人¥3,500,小童¥1,500
 
紅葉季時周邊被一大片紅葉包圍,大家可以選擇騎住馬嚟慢慢欣賞。
10月20日~11月30日限定,需時2小時30分鐘,每人¥35,000。
 
參加富士山登山嘅話會有專業導遊帶你上山,包保你可以安全咁登上山頂。
 
仲有其他如採摘葡萄體驗等太多精彩活動不能盡錄啦,過嚟玩返晚包你有個終生難忘嘅露營體驗!
 
================
星のや富士
地址:山梨県南都留郡富士河口湖町大石1408
電話:050-3786-0066
房價:2人一房 ¥72,000起/房
官網:hoshinoyafuji.com/