去旅行玩完成日返到酒店都想舒舒服服休息吓,所以小編對酒店嘅條件一啲都唔求其,不過我相信以下嘅幾項其實都係基本野,下次會唔會再嚟,真係要睇間酒店今次畀到啲點嘅住宿體驗。
 
・要近電車站
・房間唔可以太細(至少要打開到行李箱)
・床鋪浴室要乾淨衛生
・最好附近有野行有野食有野行但又唔會太嘈
・價錢唔好太貴
 
今次關西行就得到Sponsor試住距離京都站近近地嘅「RIHGA ROYAL HOTEL KYOTO」,呢間酒店新裝咗冇幾耐所以都可以想像到房間實乾淨舒服。果然!一開門已經靚到同同事一齊嘩嘩聲!有幾正?一次過坦盪盪公開畀大家睇!
 
酒店客房:
 
 
今次入住嘅係「Luxury Twin (Regular)」,雖然呢張係官相,但入面真係咁靚!最誇張係廁所都有條長走廊,淋浴間又超大,沖完涼著衫都唔會撞手撞腳!房入面仲有好多細微位會令人覺得好貼心,連對室內拖鞋都充滿驚喜,正到入咗房有啲唔係好想再出街行!
 
現代人冇返啲音樂襯底又點得!呢部野一入房就畀眼利嘅同事發現到,可以用藍牙link去手機播歌,啲聲都幾靚,後來同酒店職員傾開,原來真係有唔少住客曾經問過部機邊度可以買到。(笑)
 
迷你吧冇可能冇,呢度更加連咖啡機都準備定畀你,想飲新鮮熱咖啡?幾時都得!
 
唔想飲咖啡,房入面仲有幾款日本茶俾你慢慢歎!個茶壺仲係特製嘅鐵茶壺,重手之餘保溫效果非常好,更加容易逼哂茶葉嘅香味出嚟,對住街外風景呷啖茶,真係非常之享受。
 
有啲酒店一入房就要上床,想搵個可以座嘅空間都冇。不過呢度絕對冇呢個問題,你睇張疏化大到夠瞓成個人,可以同朋友喺度傾吓計食吓零食,又點捨得咁快上床瞓教!
 
呢幾盒五顏六色嘅疏洗用品係咪好靚呢!原來每隻色都代表住京都一大特色,好似綠色就係嵐山嘅竹林,單係呢啲細位,已經覺得酒店花咗唔少心思。
 
點解話酒店好貼心,因為連嗽口水都準備好,呢樣野其他酒店真係比較少見。
 
到大家都勁關心嘅浴室啦!呢度嘅浴室大到一幅相好難影得哂,有得淋浴呢個一早預咗,估唔到仲有個咁舒服嘅浸浴空間,長度剛好可以成個人浸哂落去,冬天浸勁舒服!
 
連浴鹽都放定喺度等你用,唔慢慢浸返個浴真係好對唔住酒店對唔住自己!
 
頭頂式花灑嘅水力超舒服,水力溫柔到好似熱帶雨林嘅雨水咁,瞇埋眼咩都唔做就咁企喺度發呆都覺得好歎!Σ(´∀`;)
 
酒店連沐浴用品都勁講究,Body Lotion、Body Soap、Conditioner、Shampoo通通用哂LAURA ASHLEY,仲要唔係極細支嗰種,唔使就住就住用!日本冬天咁乾,支Lotion可以帶出埋出街用,又香又潤但又唔會好油,size帶出街又唔會阻地方,正!!
 
餐飲美食:
 
隨住酒店改裝,呢度亦新設咗「KAZA」呢間靚裝All Day Dining嘅餐廳,如果你入住嘅Package有附設早餐,就可以過嚟呢度享受非常好味嘅自助早餐。坦白講以自助餐嚟講呢度種類唔算太多,但勝在樣樣都勁新鮮啱啱整起,同埋就算係臨近Last Order,廚師都仲繼續密密整冇停手,唔會停哂手等收工。
 
除咗KAZA之外,呢度嘅地底同頂樓原來都開設咗幾間餐廳,要景有景,要美食有美食,如果諗住喺酒店休息吓Hea吓,行幾步就可以去到餐廳,方便到爆!
 
去食早餐帶埋朝食券是常識吧!(雖然我成日都入咗?先記得要帶......)
 
「KAZA」熱食感覺出得好慢同每次量唔多,原來有啲熱食係廚師即場煮即刻放入熱食盤內,唔怪得樣樣睇落都好似啱啱整起!
 
室內環境非常舒服同寬落,拎住餐盤走動都唔使左閃右避。
 
試完一輪,個人認為即製芝士奄列、雞肉西京燒、永遠都係啱啱炸起嘅脆卜卜薯餅,同埋口感軟糯嘅日本飯係一定要食嘅必食之選!食飯嗰陣記得一定一定要加埋魚干仔漬物,味道同日本米超級夾,就算幾飽都好,加咗魚仔我保證你實食到最少一碗!
 
如果有Budget又想帶住另一半享受一個難忘嘅晚餐,極度推介大家去14樓嘅「TOP OF KYOTO」,呢度係住京都唯一一間360°旋轉餐廳,由於酒店附近並冇高樓大廈,所以呢度視野非常好,食完一餐飯剛好轉完一個圈,欣賞住萬家燈火去品嚐法國美食,你話點會唔難忘!
 
「TOP OF KYOTO」嘅日景同夜景都非常之靚,呢度亦有提供早餐,如果想食一個與眾不同嘅奢華早餐,呢度係唔錯嘅選擇!(當然價錢另計~)
 
地下一樓仲有幾間餐廳,好似呢間「橘」就提供法式懷石料理,玩埋日法Fusion菜,逐道上夠哂精緻。
 
酒店內部巡遊:
 
如果住過RIHGA ROYAL,我諗有唔少人都同小編一樣一步入大堂就覺得呢度好京都,原來呢度嘅裝修隱藏咗唔少京都元素!而除咗泳池呢啲基本設施之外呢度仲竟然有個小教堂,酒店入面有埋教堂,真係非常少見!
 
Front Desk紅色嘅枱面概念原來來自神社嘅紅色屋頭頂,牆身同地吓嘅條紋原來就係嵐山嘅竹林。雖然加入咗傳統嘅京都元素,但室內嘅設計非常時尚,古今合一但毫無違和感,呢啲就係大師級設計!
 
呢度有18間大大小小嘅宴會廳畀客人開辦唔同類型嘅活動,當日所見已經有試食會同婚禮,Booking勁Full。
 
酒店入面有個小教堂真係好誇張!好多日本人喺呢度搞完婚禮就會直接喺隔離宴會廳設宴,唔使拎住勁多野走嚟走去,好方便。
 
唔止西式婚宴,和式傳統婚宴呢度都可以幫你安排!
 
大堂嘅Souvenir Shop有好多京都本土特產,如果真係冇時間出去揀手信,喺呢度執幾件一啲都唔失禮。
 
交通:
 
眼見大堂時時刻刻都有客人搞手續就知呢度應該幾多客人入住,緊係啦,呢度交通真心幾方便,由京站行過去10鐘之內一定到,如果10分鐘都覺得太遠,唔使怕,酒店有15分鐘一班嘅免費接駁巴士往來酒店同京都站,想行路定搭車?隨你喜歡~
 
就係呢架巴士啦,認實佢!酒店仲特別喺大堂劃分咗個候車區,有舒服疏化坐住等車,車到會有專人過嚟通知你,一定唔會Miss咗班車。
 
價錢:
 
講咁耐大家係咪好關心個房價呢?唔好以為有咁多Facility同靚裝就一定好貴,小編入住嘅「Luxury Twin(Regular)」官網公價做緊¥18,900(約港幣$1,270)一間房,「Standard Double」做緊¥11,800(約港幣$800),訂房網仲會平大概港幣$100左右,呢個價錢住到呢種級數,真係好抵玩!
 
Luxury Twin(官網)
 
Luxury Twin(Expedia)
 
Standard Double(官網)
 
Standard Double(Expedia):
睇完咁長氣嘅介紹,大家有無少少心動呢?希望今次嘅試住報告對大家下次京都之旅有用,同埋最後想再次鳴謝Expedia嘅Sponsor,畀我地有個咁正嘅住宿體驗,多謝~(^Д^゚)ノ
 
RIHGA ROYAL HOTEL KYOTO
地址:京都市下京区東堀川通り塩小路下ル松明町1番地
電話:075-341-1121