伴你成長!那些年我們一起玩過的超任!

想當年放學好開心,做下功課,睇下卡通片,之後最大嘅娛樂就係同阿哥打機 (或者睇佢打機)唔似得而家d小朋友,放學淨係可以補習,做功課,溫書,上興趣班之後就訓覺再等返學
 
 
當你死機或者開唔到機嘅時侯,拎起盒帶吹下或者拍下佢!(相信大家一定做過)今日就同大家懷緬同分享下我好鍾意玩嘅遊戲!唔知係咪你嘅心水,但一定有共鳴 
 
1.Super Mario/Mario Kart/Doctor Mario
 
呢隻咁經典嘅遊戲應該都唔駛點介紹。除左經典玩法,仲有賽車,消方塊!
 
 
最痛苦嘅事莫過於你賽車排緊第一,之後跌左落街,被人釣番上黎patpat都未坐暖又俾人撞返落去…完
 
2.魂斗羅
 
超經典射擊遊戲!扮特種部隊,由真人打到外星人、爭野食轉槍、迷失地圖係咁搵阿哥、最尾變種大佬好似俄羅斯輪盤咁,緊張過買六合彩。好懷念呀
 
 
3.新熱血硬派
 
動作RPG遊戲!扮演熱血高校嘅不良學生,有4位角色自由更換!除左有日本黑道之外,遊戲入面仲有好多抵死嘅情節,例如打打下可以去坐過山車
 
 
4.奇奇怪界
 
呢隻畫風超可愛嘅遊戲係講一個巫女打妖魔鬼怪勇救七福神嘅故事!(日本都有何仙姑 ?)飛符打怪就唔少得!仲可以召喚唔同嘅小幫手,真係巧打耳呀!!!氹女朋友打機必備
 
 
5.恐龍戰隊 (Power Rangers)
 
想當年呢套《恐龍戰隊》都幾hit,個個都爭住要做5色戰士!我就梗係做粉紅戰士啦
 
 
6.娛樂金魚眼
 
呢隻由多個MINI GAME組成嘅合家歡遊戲為我帶嚟好多歡樂,亦都令到我認識到人性嘅黑暗面…特別係沙灘個part…梗係丟暈人同沖人落海好玩過執貝殼啦 如果一個唔小心抽中問答小遊戲就可以即刻GG,符碌王必勝!(個陣鬼識日文咩
 
 
7.龍珠/街霸
 
格鬥類遊戲不嬲係我弱項,金魚腦,記住左d招出幾下就唔記得晒!嚟嚟去去個幾招,勁快俾人捉到路,KO
 
 
8.賓尼兔運動會
 
Chok爆手制系列!舉重跳傘跳高跳遠無難度!不過跑出界就……飛哥跌落坑渠…?
 
 
9.救火英雄 (The Firemen)
 
呢隻遊戲未必好熱門,但係題材就相當特別,烈火雄心mode全開!點樣做一個盡責嘅消防員去救火救人,你做得到
 
 
10.炸彈人/泡泡龍
 
百玩不厭,簡單易玩但係緊張刺激!特別當你手持好多炸彈以為可以炸瓜人嘅時侯,往往就會手痕放多左粒,之後自爆 (我最鍾意追住我阿哥嚟炸!哈哈哈!)
 
 
其實好玩嘅遊戲又點只咁少…變相怪傑、幽遊白書、Gundam等等等等…太多太多不能盡錄…不如你地又分享下最鍾意玩咩呀