休閒下午慢慢行-吉祥寺人氣特色雜貨小店推介

 
鍾意雜貨小物嘅朋友嚟到日本一定會覺得自己身在天國。無論係和風日製定係從歐美國家運入嚟嘅精美商品,無論喺大型連鎖雜貨店定係街頭小店都可以尋覓到各種各樣你唔會見過嘅得意小品!不過,始終香港人最鍾意去嘅東京市區都係大型旗艦店林立,如果真係想好舒服行行街睇下靚嘅雜貨小品,我就推介大家嚟吉祥寺
 
吉祥寺同東京市中心都隔著一段距離,但其實搭車都唔係真係好遠嘅。而且呢度曾經連續五年被東京市民評為最想居住嘅地方第一位,嚟呢邊行一轉我相信你都會有呢個諗法呀。呢度唔會有好高好高嘅高樓大廈、有個好靚嘅公園、有條特色商店街、周邊開咗好多文青風格嘅cafe,其實真係麻雀雖小但五臟俱全。係香港行商場行到悶,都真係幾推介大家嚟呢邊唔單止可以行街,仲可以睇景色。

 

咁就快啲同大家介紹下吉祥寺有嘅特色小店啦!

 

1)とことこ雑貨店
【地址】 東京都武蔵野市吉祥寺本町 2丁目-16-17
【營業時間】11:00-20:00 

 

日本多貓奴就好多人都知,如果香港嘅貓奴朋友嚟到吉祥寺就千其唔好錯過呢間充滿貓貓小物嘅雜貨舖!事關間舖頭係要上三層樓梯,搵嘅時候要小心啲留意下地面個好似木屋嘅標記喇。
 

 

上咗嚟開門一睇,簡直就好似入咗一個唔同嘅世界!眼前見到嘅所有,係所!有!商品都係同貓貓有關。
種類豐富嘅程度簡直係你噏得出嘅商品都有。從茶包到茶杯到廚具到文具到手袋到手機殼到耳環到雨傘到post card,我真係唔敢估呢間舖頭總共有幾多樣商品啊。我只能讚嘆,所有野都好卡哇依~
 
超級靚嘅貓貓杯碟。
 
個人推介:貓菊花Tote Bag
 
好特別嘅貓茶包,平平地當手信都唔錯。
 
比香港款式多好多嘅iPhone殼。
後來問起店主先知道原來呢間雜貨店係同一家出名嘅貓cafe係姐妹店,所以呢度有啲限定同埋Original嘅商品,設計係以cafe入面嘅貓貓為原型,係全世界真係得呢度先有得賣架!當中包括啲好得意搞笑嘅明信片,鍾意貓嘅朋友一定一定要來呢到呀!

 

2)Free Design
【地址】東京都武蔵野市吉祥寺本町2丁目18-2
【營業時間】11:00-20:00 

 

呢間Free Design就專門引入其他唔同牌子嘅雜貨一齊賣,所以可以一次過睇曬幾個唔同嘅牌子。睇落就覺得呢度廚具、餐具同比較實用嘅產品比較多啲。係一間細細地但都多嘢睇嘅小店,具北歐風格單品,風格都偏型,男女都有嘢睇正啊!
 
店負責人推介:長崎產傳統日式陶瓷品牌Hasami
 
姆明系列杯具

 

店內好多都係日本製嘅小動物設計製品。

 

3)Gemütlich
26/9 更新* 
收到店主聯絡,店鋪已經搬到涉谷區,如有興趣拜訪記得到新地址喔!
新地址:〒151-0063 東京都渋谷区富ヶ谷1-18-3 サンライズ富ヶ谷202 
電話:+81-(0)3-3460-1590 
【地址】東京都武蔵野市吉祥寺本町2-26-5
【營業時間】12:00~19:00 (逢星期二休息)

 

唔知有無鍾意好鍾意德國嘅朋友呢?係吉祥寺一條小巷入面有一間專門引入德國貨品嘅雜貨小店Gemütlich。原來日本人女店主曾經居住德國一段時間,回流日本之後好想念當地嘅貨品,所以決定自己引入並開舖!
 
雖然睇落呢度好似好多貨品都來自柏林,不過真係有好多好特別同埋出面好難會見到嘅商品,例如寫住德文嘅memo紙同文具。有啲裝飾品仲要係vintage嘢嚟架!例如圖中嘅藍罐NIVEA Cream,係屬於唔同年份架。

 

店主最鍾意嘅係德國車商Volkswagen特許販賣機商品,例如呢幾個袋,除咗外表得意之外,個袋入面嘅detail位先係重點,唔單止袋入面有暗花,就連拉鍊位都做得勁精緻。呢度行一轉真係會令人聯想起係歐遊時睇到過嘅小店呢。

 

4)Cave
【地址】東京都武蔵野市吉祥寺本町2-26-1
【營業時間】11:30~20:00 

 

日本雜貨店主題通常貓貓兔兔狗狗嘅商品都會較多。但我真係估唔到連青蛙都受歡迎!
 
呢間Cave嘅店主就因為好鍾意青蛙所以開舖頭專賣一切同青蛙有關嘅商品。實不相瞞我呢啲都市港女就好怕青蛙,亦從來唔覺青蛙可愛,但入到黎之後竟然都覺得一啲Q版嘅青蛙商品真係幾得意!
例如和風設計嘅手帕同門布就好有日式夏日單品嘅感覺。仲有青蛙古董同擺設其實都幾有feel,加上店內都是綠色做主題,令人行得幾舒服開心呢!
連蝌蚪公仔都有!
不過當我問老闆娘有冇養青蛙嘅時候,原來佢係無架!佢解釋因為餵青蛙食嘢係好麻煩(因為淨係食昆蟲),瞬間又令我想起真實嘅青蛙的確...嗯。
 
講真,吉祥寺嘅雜貨店又點止呢幾間啊~不過真係要睇下大家嘅腳骨力喇。不過,行攰咗之後可以去下附近啲餐廳咖啡店坐下休息,充完電再戰。總之如果要黎玩就預足大半日好啲喇!

 

《番外篇》
行完商店街可以到附近這個井之頭恩賜公園坐坐,中間有條橋個景色超靚。好多人就鍾意係公園入口買嘢飲行入去公園搵張凳歇歇。如果唔想坐cafe驚悶親都可以黎公園散吓步,吸收大地靈氣嘛!

 

註:本篇文章內所有商品及店內環境拍攝全部經過店方許可。