【今日日本又放假!】 因為今日係極重要嘅「成人之日」!

講到日本嘅重要節日,不得不提每年1月第二個星期一(即係今日!)嘅「成人の日」,呢一日唔單止係日本公眾假期,仲係對年滿20歲,步入成人階段嘅日本人嚟講非常重要嘅一日,因為喺呢一日,年滿20歲嘅日本人會收到滿滿嘅成年祝福,亦表示步入新一年,人生將會步入另一個新階段。
 
 
為咗祝賀步入20歲呢個咁重要嘅日子,各縣各市都會舉行大大小小嘅成人式,由於成人之日無宗教背景,只係單純地為滿20歲嘅人送上祝福,所以儀式唔局限於神社,有啲地區更加會喺主題樂園舉辦成人式,等年輕人可以玩得盡興!( 日本人好幸福啊......)
 
 
咁重要嘅大日子大家緊係會想著靚靚留個美好回憶啦,女仔通常都會Set哂頭化哂裝著哂和服上陣,而男仔就會著住整齊嘅西裝,俊男美女充斥全場,畫面非常之賞心悅目。如果有幸成人之日咁啱喺日本渡過,應該唔難見到滿街甚至係滿車都係和服美女嘅奇景!
 
 
 
成人禮一生人只有一次,所以日本年輕人都非常期待呢一日嘅來臨,與其話呢一日係佢地成為大人嘅大日子,對佢地嚟講呢日更加係製造共同回憶嘅大型聚會,試諗吓,喺若干年後大家又再之圍埋講起當日盛況同蝦碌野,係咪會好似重返20歲,重拾童心先!