【人物專訪】超萌反差・筋肉美少女「才木玲佳」

 
繼上次訪問完日本變性人「さつきぽん」之後,今次要訪問嘅亦係近期大熱嘅一位人氣新星「才木玲佳」頻頻係電視節目亮相嘅佢,並唔係演員或者歌星,而係一名啦啦隊。
 
聽落好似平平無奇,不過最令人驚艷嘅其實係佢超反差嘅外型。一臉稚氣,活潑可愛嘅才木玲佳,遠鏡一睇,就可以見到佢全身強勁嘅肌肉,甚至可以媲美男生。正因為呢個超萌反差,令到佢人氣急升,等我地一齊探討下佢嘅健美之路喇。
 
 
 
由啦啦隊出發
 
24歲身高150cm嘅才木玲佳係啦啦隊「Cheer♡1」第2期生,專門幫日本摔角賽WRESTLE-1做應援團。係普通人心目中,啦啦隊成員應該係好陽光好甜美,但萬萬都估唔到會同筋肉拉上關係。
 
 
 
練肌之路
 
「一開始係為咗減肥而開始去健身室,之後知道有機會可以參加「後樂園HALL」嘅賽事,覺得更加應該要好好鍛練身體,加上自己唔服輸嘅性格,所以就一直努力練肌肉。」
 
其實係採訪過程中,已經知道佢係一個自我要求好高嘅人。除咗身體上嘅鍛練,其實佢學業成績都好優異。大學畢業後依然不停進修唔同類型嘅科目。甚至休息嘅時侯,我地都會互相交流語言學習,好學指數爆燈!
 
 
 
加入格鬥行列
 
除咗啦啦隊之外,玲佳另一個身份其實係格鬥選手。不過身為女仔,打到周身瘀傷,疤痕處處,唔通佢唔怕咩?佢就霸氣回應:「完全唔驚。」
 
「因為我精神同身體方面都好強,所以完全無問題。反而擔心受傷會影響我之後嘅訓練。不過如果真係有瘀傷,我會當佢係我嘅勲章。」
 
小編不禁表示呢番說話出自一位咁可愛嘅女性口中,真係好型呀!每道瘀傷都真係有血有汗㗎!
 
 
 
身邊的聲音
 
「一開始從Fans口中都聽到好多疑惑嘅聲音,不過最近有收到其他健身朋友嘅訊息,話好佩服我,而且見到我嘅身型都令佢地更有動力去健身。」
 
採訪前透過其他訪問得知玲佳嘅公司對於佢持續變大隻都略有微言。因為始於係啦啦隊,身型太健碩好似同其他隊員顯得格格不入。但勢估唔到佢而家成為「健身指標」,成為其他人健身嘅動力。
 
 
 
意外收獲
 
自練肌肉以來,玲佳嘅啦啦隊工作唔單只無影響,同時仲多咗好多「筋肉」類型嘅工作。由上日本電視節目「有吉反省會」以「筋肉Idol」身份登場,再到「週刊playboy」入面爆肌登場,超反差嘅衝擊令藝能界產生好大嘅迴響。甚至連「筋肉演講」佢都做埋。相信對佢黎講絕對係一個意外收獲。
 
 
 
「筋育」之道
 
「一有時間就會去做「筋育」,即係培育肌肉嘅訓練。同時亦都會食好多野,吸取好多蛋白質。不過遇上拍攝嘅時侯,都會控制食量嚟維持。」
 
現場所見,玲佳真係可以自己食晒成個飯盒,完全無節食嘅煩惱。大家都可以好似玲佳一樣任食唔嬲㗎。前題係…你要有同佢一樣嘅運動量
 
 
而問到佢仲有無邊部分想再加強嘅時侯…佢嘅答案係:「胸肌。」而原因係…因為佢想震動胸肌。(俗稱震波
 
 
為測試佢嘅肌力,小編仲同佢即場示範咗一場「拗手瓜」,結果唔駛講,被秒殺 
 
 
 
理想中的戀愛對象
 
被問到理想型嘅時侯,小編都預測佢會喜歡同佢一樣喜歡健身嘅類型,不過估唔到原來仲有以某位明星為指標 
 
「理想型係,放假個陣就會一早起身去健身,認真嘅男人。身型嘅話,最好就要有胸肌,好似Mighty Thor(雷神)就最好。」
 
 
問到而家嘅感情狀況,玲佳第一時間表示單身,不過唔駛興奮住,聽埋落去先…
 
「當然係單身。唔好講結婚,連男朋友都無。因為我係Idol。」
 
原來Idol係唔可以談戀愛㗎,巴打們,你地唯有練住胸肌等下啦 
 
 
 
後記:記得係香港第一次見到玲佳嘅新聞個陣,已經好想親眼見下呢個女仔。到有機會去日本做訪問,我第一時間就諗起佢。果然拍攝當日,佢就同相入面一樣咁可愛,同時亦都好健碩。而且原來所有筋肉朋友都一樣,影相係要搽野㗎。不過唔係搽油,而係搽凡士林 
 
 
不過玲佳嘅魅力除咗來自佢嘅反差萌之外,同時亦來自佢活潑開朗嘅性格。唔知係咪因為做開啦啦隊嘅關係,佢唔單只好健談,仲時時面帶笑容,令到整個拍攝現場都充滿歡樂。佢仲同我講,佢媽媽嘅偶像係…「劉德華」,咁唔知佢媽媽有無睇過「大隻佬」哩  大家記住多多支持筋肉美少女・才木玲佳啦。
 
 
 
【‪才木玲佳】
出生日:1992年5月19日
出身地:埼玉縣
高度:150cm
Twitter:@saikireika