【人物專訪】日本索爆變性人「さつきぽん」

講起變性,你地一定會諗起「變性之都」泰國。而講起變性人,大家可能會諗起好早期嘅河利秀或者近年拍電影而彈起嘅超索變性人Poy,連郭富城都讚過佢真係好靚女,可想而知佢幾有魅力。
 
不過近期日本藝能界就出現咗一位新星,就係「さつきぽん」。佢唔只擁有模特兒嘅身軀,明星般嘅面孔,最重要係…其實佢亦都係一位變性人。
 
 
生於1986年,名古屋出生嘅「さつきぽん」,13年係泰國正式完成咗變性手術,15年再係泰國參加咗變性人大賽「Miss International Queen 2015」勇奪特別賞後正式加入演藝圈。今日佢就會同我地分享下佢由男仔變為女仔嘅心路歷程。
 
 
 
想成為女仔嘅慾望
 
「由細個有認知能力開始,我就覺得自己係一個女仔。」
 
性別認知係坊間來講,大致可以分為先天同後天。而さつき就屬於先天因素,因為佢表示自小朋友開始,就覺得自己應該係一個女仔,現有嘅男性身軀並唔係屬於佢。
 
 
 
變性前嘅困擾
 
「雖然日常生活全部都好辛苦,不過其實最困擾我嘅係我嘅身高。因為隻腳太大隻,所以好多時買鞋都無適合嘅Size。除此之外,工作量亦都唔多。」
 
其實之前已經聽過好多變性人係日活上嘅困難,小如去廁所。可能就連去男女廁呢個好簡單嘅問題,亦都會因為性別認知方面而感到不安。不過估唔到,最困擾さつき嘅竟然係佢嘅身高。
 
由於身高問題,佢腳板嘅Size就成正比咁發展。唔好講佢本身係男仔嘅身軀,其實好多時就連女仔只要腳板大少少,可以買嘅鞋款都已經少左一大半。所以係呢度,小編表示十萬個同意,亦都深深明白當中嘅苦況
 
 
 
進行手術嘅決心
 
「因為好想結婚,所以下定決心去做手術。」
 
果然恨嫁的心係無分國籍。問到さつき點解可以下定決心去做手術,佢馬上就答因為「想結婚」。我相信呢個都係每一個女仔嘅心聲,重點係特顯咗さつき小女人嘅一面
 
 
 
家人的聲音
 
「家人唔單只無反對,而且仲好體諒同支持我。」
 
人生路上,不論大大小小嘅事,如果能夠獲得別人嘅認同同支持,好多時都會事半功倍。就算身邊一百個人,一百個都反對你,但係返到屋企可以得到家人最窩心嘅鼓勵同支持,相信先至係令人繼續「走下去」嘅最大動力。這些機會,並唔係個個都可以擁有。所以小編聽到嘅時侯,真心覺得さつき好幸福,特別係呢個唔係一個「簡單」嘅決定。
 
 
 
體會變性之痛
 
「除咗手術嘅痛苦之外,荷爾蒙嘅療程亦都令人好有負擔好痛苦
 
平時跌親撞親可能你都已經會痛到「呀呀叫」,更唔好想像,佢要經歷無數嘅切除或移植手術同埋服食大量荷爾蒙去營造一個女性嘅體質。漫長嘅手術同復康過程,真係唔係一般人可以做得到。唔通佢就無諗過放棄?
 
 
 
「諗過好多好多次放棄…不過因為真係好想得到呢個身體,所以都堅持落去。」
 
到底要幾大嘅決心同慾望先可以令佢忍受咁多痛楚都唔放棄。真心佩服佢嘅毅力。
 
 
 
 
展開人生新一頁
 
「我而家除咗係電視藝人,模特兒,專欄作家之外,仲經營緊一間化妝教室
 
參加咗選美返到日本發展嘅さつき備受關注。相信除咗因為佢令人好奇嘅背景之外,亦因為佢真係一個好敬業樂業,事事做到最好嘅人。「有目標,有方向」的人是最美
 
 
 
對生活感到滿足
 
「我對而家嘅生活好滿意,因為可以每日都化妝。」
 
以為佢會答「因為可以做到女仔好幸福…」比較大路嘅答案,點知原來可以成日化妝已經好開心。果然係一個容易滿足嘅女人。巴打們,諗得過啦!
 
 
 
感情路上
 
「我鍾意比較聰明嘅男仔。不過現階段會專注工作,所以未有男朋友。」
 
相信大家都會好奇,到底さつき鍾意咩類型嘅男仔哩。佢就好鬼馬咁表示鍾意啲醒目嘅男仔!而且事業啱啱先開始,男朋友嘅話,可能都要等等。不過計我話,醒目都唔係重點…重點係,除非你唔介意身高,如果唔係你要身高超過181cm先好去追佢
 
 
 
給香港朋友的話
 
「希望將來有機會可以出現係香港嘅電視節目,為其他好似我咁,本身係男仔嘅跨性別人仕而努力。」
 
 
後記:さつき係我嚟到日本嘅第一個訪問。對比上慣節目嘅佢,可能我仲緊張。不過佢真係好Nice,唔單止特登放慢速度就我,而且仲經常保持笑容。去到最後我地要求佢做「港女十式」,佢都好專業咁為我地完美呈現。
 
另外,本身係男仔嘅佢,對比我呢個「天生」嘅女仔,佢嘅一舉手一投足,甚至連說話嘅聲線都比我更似女人。我企係佢側邊,真係有少少自愧不如,哈哈!不過佢真係好可愛,希望大家都可以多多支持さつき啦
 
 
「さつきぽん」
出生年份:1986年
身高:181cm
三圍:B96 W67 H100
 
感謝收看!嚟緊仲會有其他日本人氣藝人出場㗎,記住繼續Follow,多多支持