【京都玩過界!】 帶你去「彥根」食睇買!

【京都玩過界!】 帶你去「彥根」食睇買!

如果你已經去過關西好多次,仲係不停Repeat難波、心齋橋、清水寺、奈良等等呢啲隨口都嗡到幾個嘅初心者必到景點,不如抽啲時間出嚟去遠少少,好似距離京都一個小時以內車程嘅「彥根」,位於滋賀縣琵琶湖東邊,有靚景有美食,最緊要係目前外地觀光客唔多,古色古香,好似返咗去舊時嘅日本咁!
 
【京都玩過界!】 帶你去「彥根」食睇買!
 
如果時間唔多又諗住即日來回,可以直接去彥根嘅夢京橋一帶,參觀完國寶級古城之後可以喺老街慢慢行慢慢影相,成條城下町商店街有唔少食店同手信店,所以想下定決心唔買野,根本冇可能!
 
1. 彥根城
 
【京都玩過界!】 帶你去「彥根」食睇買!
 
即使唔係特別喜歡歷史都建議要去彥根城睇一睇,因為城內嘅建築同靚景都足以令你拎住相機不停影影影!呢座已經有成400幾年歷史嘅古城用咗20年時間去興建,城內嘅「天守」係指定國寶,每一條木柱都刻印住歷史嘅痕跡,嚟到記得一定要上頂樓,呢度可以睇到一望無際嘅彥根全景,風景勁靚!
 
另一個必睇位係每日兩場嘅「彥根貓登場Show」,彥根貓係彥根城嘅吉祥物,每日嘅朝早10點半用下午1點半就會出現喺天守前面大擺Pose畀大家影足30分鐘,本身以為係小朋友先啱睇,點知彥根貓嘅Pose勁搞笑抵死,唔覺唔覺會睇足全場!
 
【京都玩過界!】 帶你去「彥根」食睇買!
天守入面嘅樓梯又高又直,安全起見大家唔好怕醜怪,可以手腳並用上落樓梯。
 
【京都玩過界!】 帶你去「彥根」食睇買!
未夠鐘已經有唔少人坐咗喺度等,現場氣氛好好,彥根貓每做一個動作大家都笑得勁大聲!
 
【京都玩過界!】 帶你去「彥根」食睇買!
呢個玄宮園亦係城內必遊之點,由江戶時代嘅大名斤建,好天嘅時候湖水簡直就係一塊鏡,反映湖邊嘅建築同一花一草,個景靚到有當地人特登走去寫生!
 
彥根城
地址:滋賀県彦根市元町4番2号
電話:0749-30-6143
營業時間:08:30~17:00
入場費:彥根城及玄宮園 大人 ¥600、小童 ¥200
 
2. 政所園
 
【京都玩過界!】 帶你去「彥根」食睇買!
 
十個有八個會走入呢間店嘅人應該都係被廚窗精美嘅擺設所吸引,入到去仲驚喜,除咗出面都見到嘅陶瓷碗碟之外,店內仲有好多其他可愛瓷器小擺設,買嚟做小手信送畀姐妹們最適合不過!唔單止有野買,由於呢度係可以飲杯野休息吓嘅「茶処」,當然仲有多款同抹茶有關嘅甜品同飲品,行到攰攰地,可以喺度休息返陣抖一抖。
 
【京都玩過界!】 帶你去「彥根」食睇買!
唔好以為舖頭唔係好大好快就行完,樣樣Product都咁靚,慢慢研究一番時間就係咁唔經唔覺咁流逝!
 
【京都玩過界!】 帶你去「彥根」食睇買!
行咗冇耐店員突然遞咗杯茶過嚟,冬天有杯熱茶飲吓真係暖到入心!同埋想講呢個係一個好好嘅軟性推銷,試完杯茶有唔少人都走去counter問呢個係咩茶,店入面有冇得買。
 
【京都玩過界!】 帶你去「彥根」食睇買!
連個茶壺都靚過人,可能沖茶真係會好飲啲!(笑)
 
【京都玩過界!】 帶你去「彥根」食睇買!
呢隻招財貓個樣明明好似好普通,但又係會成功令人忍唔住停低望多兩望!貓仔有舉左手同舉右手之分,左手招丁右手招財,唔好買錯~
 
【京都玩過界!】 帶你去「彥根」食睇買!
話明係「茶処」,又點可能冇同茶有關嘅產品發售!
 
【京都玩過界!】 帶你去「彥根」食睇買!
呢度嘅Choice Tea包裝得好靚,¥100一包勁抵玩,買嚟做小手信都幾好睇。
 
【京都玩過界!】 帶你去「彥根」食睇買!
呢兩包「政之香」就係之前店員畀我地試飲嘅茶啦,「甘味一撰」嘅茶味飲落會比較香醇甘甜,而「香味一撰」就比較著重香味,聞落比飲落更香。
 
【京都玩過界!】 帶你去「彥根」食睇買!
行完一輪最後緊係要坐底慢慢食返個甜品或者飲杯茶啦!如果天氣唔係太凍,不妨坐去室外位置,室外有個小小嘅庭園,環境好舒服,係一個好好嘅影相位!
 
【京都玩過界!】 帶你去「彥根」食睇買!
喺一個咁舒服嘅空間歎茶真係勁寫意!
 
政所園 夢京橋店
地址:滋賀県彦根市本町2-1-7-1
電話:0749-22-8808
營業時間:09:30~18:00
休息日:不定休
 
3. きむら
 
【京都玩過界!】 帶你去「彥根」食睇買!
 
不足10cm長嘅小型鮎魚係琵琶湖特有嘅品種,既然嚟到位於琵琶湖東邊嘅彥根,當然要試吓小鮎魚製品!呢間KIMURA就係可以買到唔同小鮎魚加工品嘅專門店,最正就係部份產品有得試食,齋睇樣好多款個樣都差唔多,但試落味道非常唔同,所以買之前記得試吓味,買多幾包返香港可以隨時加餸!
 
【京都玩過界!】 帶你去「彥根」食睇買!
店內以小鮎魚嘅加工品為主,單係呢種小鮎魚店方已經有多種唔同炮製方法同食法,真係大開眼界!
 
【京都玩過界!】 帶你去「彥根」食睇買!
細細盒嘅包裝帶多兩盒返去都唔覺好浪費行李空間,又多個藉口掃貨啦~
 
【京都玩過界!】 帶你去「彥根」食睇買!
呢個「小鮎魚煮」算係呢度嘅主打,唔試由自可,一試真係不得了,鍾意食魚的話一定會愛上,用嚟送飯真係咩餸都唔需要!
 
【京都玩過界!】 帶你去「彥根」食睇買!
就係呢隻啦,有大盒同細盒之分,如果一家人都鍾意食就一定要買大盒,否則小編敢寫包單你一定唔夠食!
 
【京都玩過界!】 帶你去「彥根」食睇買!
呢個「鮒寿司」小編都覺得好值得一試,唔係因為好味,而係因為佢係滋賀縣嘅鄉土料理,喺日本唔係任何地方都可以食到。不過留意返,雖然佢叫壽司,但其實係醃製食品,用鯽魚、米飯、鹽醃足十幾個月,味道一啲都唔似平時食開嘅壽司,咸味較重,仲會有少少芝士味(講真真係幾重口味,連日本人都唔係人人接受得到!),比較適合用嚟送酒。
 
【京都玩過界!】 帶你去「彥根」食睇買!
除咗加工食品,店內亦設食堂提供新鮮鮎魚料理,有鹽燒有天婦羅任君選擇,味道好傳統。
 
あゆの店 きむら 彦根京橋店い
地址:滋賀県彦根市本町二丁目1-5
電話:0749-24-1157
營業時間:09:30~17:30 (Lunch Hour 11:00~14:30)
休息日:星期二
 
4. 山上
 
【京都玩過界!】 帶你去「彥根」食睇買!
 
呢間「山上」係漬物專門店,入面有幾十款唔同嘅蔬菜漬物,當中有唔少都係坊間比較少見,而大部份嘅漬物都有得試食,試過之後你就會知道原來漬物都唔一定係重口味,清清地感覺更健康。大家買還買,自用的話唔好買太多,因為呢間舖頭嘅漬物冇乜添加防腐齋,好容易過期。
 
【京都玩過界!】 帶你去「彥根」食睇買!
門口呢個哥哥好搞笑,由於當日採訪關係需要喺條街不停走嚟走去,個哥哥每見親我地就話「你地又返嚟啦?」,仲不停叫我地試食,咁好service,試問有邊個會忍心食完就離開,唔入去行吓!
 
【京都玩過界!】 帶你去「彥根」食睇買!
店內大部份漬物都可以試食,有啲咩疑問不妨問問店員,佢地個個都勁nice,絕對唔會硬銷,見到你試食試得好滿足佢地已經勁開心,勁攞唔同野畀你試到夠本。
 
【京都玩過界!】 帶你去「彥根」食睇買!
呢個日野菜係近江特產,好爽口,醃製過之後有少少wasabi味,但味道仍然好清,係嚟呢度嘅必買之品!
 
【京都玩過界!】 帶你去「彥根」食睇買!
呢幾條就係日野菜嘅真身,喺香港好似未見過,大家又有冇見過呢?
 
【京都玩過界!】 帶你去「彥根」食睇買!
「琵琶滿月」個名超好聽,其實佢係用咗琵琶湖產嘅大頭菜整嘅漬物,加咗有柚子味嘅甜醋醃製,入口微酸同帶有輕微嘅柚子香,好開胃!
 
【京都玩過界!】 帶你去「彥根」食睇買!
未入店門店員哥哥已經不斷可我地試呢個芝士,據佢所講呢個芝士加咗味噌去整,切成細細粒用嚟送酒一流!漬物店竟然有芝士賣,真係估佢唔到!
 
山上金亀城町店
地址:滋賀県彦根市本町2丁目1番5
電話:0749-26-0205
營業時間:10:00~17:00
休息日:不定休
 
5. からんころん
 
【京都玩過界!】 帶你去「彥根」食睇買!
 
「KARANKOLON」係一間和式雜貨店,有大量和式可愛小物,女士們未踏入門口應該已經會被店外平價雜貨吸引到想9秒9即衝入去!除咗大量和式飾物同擺設,當中好值得買嚟做紀念品嘅係彥根吉祥物彥根貓「ひこにゃ」嘅Product,個樣白??肥嘟嘟勁得意可愛!
 
【京都玩過界!】 帶你去「彥根」食睇買!
門口呢埋袋仔全部¥1,080三個,勁抵,靚到就算¥1,080一個我都會考慮買!
 
【京都玩過界!】 帶你去「彥根」食睇買!
唔單止有飾物,店內仲有銀包、電話殼等等加入咗濃厚日本元素嘅精品,嚟到呢度好容易會患上選擇困難症。
 
【京都玩過界!】 帶你去「彥根」食睇買!
店主話呢個用古布整成嘅和尚公仔係人氣No.1嘅Product,望住佢咁祥和嘅樣心情都靚啲。
 
【京都玩過界!】 帶你去「彥根」食睇買!
呢隻就係彥根嘅吉祥物彥根貓「ひこにゃ」啦,肥肥白白係咪好可愛呢!
 
からんころん
地址:滋賀県彦根市本町1-1-31
電話:0749-27-2455
營業時間:10:00〜17:30
休息日:星期四
 
6. おおすが
 
【京都玩過界!】 帶你去「彥根」食睇買!
 
如果想買盒和菓子返去做手信,呢間「OOSUGA」一定係不二之選!咪睇入面裝修好似好高級,賣嘅野就一定貴,禮盒裝¥1,000左右有交易,買嚟做手信最適合不過。
 
【京都玩過界!】 帶你去「彥根」食睇買!
啲包裝包到實一實唔知入面咩樣?唔使怕,店內大部份菓子都有sample畀你睇,仲有詳細文字解釋,不過就冇得試食,如果真係想試吓的話可以買單件散裝。
 
【京都玩過界!】 帶你去「彥根」食睇買!
呢個「三十五万石」係店內名物、彥根極具代表性嘅名菓,中間包住北海道產嘅紅豆餡同一小塊軟綿綿嘅年糕,連當地人都好鍾意買嚟做小禮物送畀人。
 
【京都玩過界!】 帶你去「彥根」食睇買!
嚟到彥根又點少得彥根吉祥物彥根貓「ひこにゃ」嘅人形燒!如果想即場食的話可以散買,一個¥130,口感比坊間嘅人形燒更煙韌。
 
菓心 おおすが 夢京橋店
地址:滋賀県彦根市本町2丁目2-47
電話:0749-24-1128
營業時間:09:00〜18:00
休息日:星期三
 
7. 焼牛 たかし
 
【京都玩過界!】 帶你去「彥根」食睇買!
 
彥根夢京橋有好多美食,雞肉親子丼飯、海鮮飯、鰻魚飯等等都可以喺呢度搵到,不過嚟到位於滋賀縣嘅彥根,當然要試吓同松阪牛及神戶牛並稱為日本三大和牛嘅近江牛啦!喺呢條街有唔少食店都可以食到近江牛料理,價錢有平有貴,如果大家想食燒肉,不妨嚟呢間「TAKASHI」,入面座位唔多,勁有家庭Feel,自己燒又得,請店主燒完再上枱都得。
 
【京都玩過界!】 帶你去「彥根」食睇買!
店內只有counter位同榻榻米座位,如果想自己燒就一定要坐榻榻米座位,counter位冇設燒烤爐。
 
【京都玩過界!】 帶你去「彥根」食睇買!
店入面有咩食,全部掛哂喺牆上面,不過只得日文Menu,如果唔識日文或唔知點揀好,可以直接點選「おまかせセット(¥2,100/人)」,食材由店主發板,比起單點,呢種食法可以試多幾款唔同食材。
 
【京都玩過界!】 帶你去「彥根」食睇買!
牛肉一到即刻急不及待放哂上燒烤爐,如果對自己技術冇信心,可以請店主燒好先上菜。
 
【京都玩過界!】 帶你去「彥根」食睇買!
呢一碟係牛嘅背脊肉「近江牛のロース肉」,油脂分佈超平均,輕輕燒一燒就可以食,入口牛味香到講唔到野,點多碗白飯包係食到停唔到口!
 
【京都玩過界!】 帶你去「彥根」食睇買!
睇見啲油光就知道塊肉有幾肥美,一定要叫碗白飯,信我!
 
【京都玩過界!】 帶你去「彥根」食睇買!
呢一碟比牛脊肉肥少少嘅係肚腩位置「近江牛特選ハラ身」,油脂更多香味更濃,就咁食可能會覺得有啲膩,所以都係嗰句,一定要叫碗白飯,信我!
 
【京都玩過界!】 帶你去「彥根」食睇買!
燒完出嚟好明顯比牛脊肉肥啲,但偏偏有唔少人鍾愛呢種油膩感,特別係近江牛呢種上等牛肉。
 
【京都玩過界!】 帶你去「彥根」食睇買!
如果食完仲覺得唔夠飽,可以叫碟即點即炒熱辣辣嘅日式炒麵,有雞肉同大量蔬菜,惹味到連碟底嘅醬汁都想舔乾舔淨!
 
焼牛 たかし
地址:滋賀県彦根市本町2-3-3
電話:0749-23-3644
營業時間:17:00~22:30
休息日:星期一