九洲第一位-暖暮拉麵

上次我就介紹左沖繩獨有既通堂拉麵,今次就介紹九州票選第一名既暖暮拉麵!
能夠九州票選第一名,就當然九州地區都有得食啦!
分店地區:福岡、静岡、神奈川、鹿兒島、大分、宮崎、沖縄、海外(連加拿大都有!)
暖暮拉麵官方網站
 

我就黎左係牧志既分店,就係國際通附近行五分鐘(見到 Starbucks 轉入路口)
每次經過都超多人排隊,尤其是午餐同晚餐時間!如果你地唔係有超強耐性,建議過左呢個時間先去。
但係都要預返半個鐘排隊?
我果日已經三點先去到,都等左半個鐘多啲!
再唔係過左夜晚十點先去,或者直情去其他分店,應該會少人啲(好似係)

地址:沖縄県那覇市牧志2-16-10
電話:098-863-8331
營業時間:上午11:00 - 零晨02:00(年中無休)
 

拿,第一位唔係我話既,亦都唔係佢地自己話既,有證有據嫁,仲贏埋一蘭!(唔知試晒個 List 要幾耐呢?)
 

點解要排咁耐?因為入面目測唔夠 15個位!咁細間鋪,國際通行過黎既人又多,所以咪要等咁耐囉!
 

用機點野食,有埋圖就唔驚點錯啦~
 

特點係每一碗麵都好多配料!全部都好有畫面衝擊?
 

比左張票廚師,佢就會叫你填呢張紙,就好似一蘭咁有得揀自己鐘意既味道口感,仲有中文對照~
 

見到都流口水!!!!我點左其中一款主打 - 芝麻蔥拉麵
超濃既豬骨湯底,蔥甜味再加上芝麻香!
啖啖拉麵都有小小芝麻既口感,感覺好特別!味道梗係好食~
雖然好多芝麻,但係芝麻味都唔會搶晒鏡,一樣食到豬骨湯底既味道!
叉燒都係甜甜的~
 

好食到停唔到?

咁你一定會問我,通堂好食定暖暮好食?
其實…真係各有特色。(逃~~~)
所以去到沖繩,兩間都要食!

回覆