[不敗日記]AKB48見面會報告

琴日7月26日,星期二,原本Lunch時落大雨,但當準備出發去AKB48見面會時,就變得超好天!
真係天助我也!好Lucky!
 
3點鐘都未到,已經嚟到荃灣悅來酒店,諗住自己太早到啦!
點知一上到5樓,已經見到超多巴打排定隊等入場喇!真係不得了!
 
 
喺4點鐘,大家就開始入場,不過唔係爆speed咁衝上前霸頭位坐,而係要先經保安檢查。
由於之前喺日本,曾經發生不愉快事件,為保障AKB48成員安全,一定要好仔細咁檢查大家嘅隨身物品。
就連一支水,都唔俾帶入場,要放低!除非,你即場飲一啖,證明無問題先可以拎得入場=0=
 
我就走上前,先影張「到此一遊」先!
 
 
睇相就知,大家可以同偶像有幾近啦>w<
 
 
好啦,大家都坐定定等見偶像!
等到5點半左右,AKB48 Team 8嘅倉野尾成美、坂口渚沙、小栗有以終於出場。
一嚟就唱「会いたかった」,我開心到好想跟住跳!不過,怕跳錯俾人鬧,都係同巴打們一齊做furi!
 
 
唱完一首歌,大家情緒超高漲!
三位成員仲有廣東話自我介紹!大家就更加開心!歡呼聲源源不絕!
司儀問到佢地前晚(7月25日)做咗d咩。
佢地就話去咗坐開蓬巴士,係咁影相拍片,好開心。
仲好強調係兩層高嘅巴士!因為,日本嘅巴士得一層。
 
 
問到佢地對香港飯(Fans)嘅印象,就話覺得香港飯嘅熱情唔會輸比日本飯,叫聲歡呼聲都好大聲!
講堅,呢番說話,真係聽到好感動!身為香港飯,成日覺得被忽視,點努力都唔及得日本飯(淚)
懂的人一定懂!會明白心情幾咁激動!所以,現場嘅香港飯又起哄!!!
 
 
 
三位成員就掟親筆簽名嘅紙飛機俾台下嘅飯們,大家即刻企起身準備!!!
不過,這些機會不是屬於我的…我太矮T_T
 
 
之後就玩遊戲「你想XXXX變成你嘅咩咩咩」,有「女朋友」、「奶奶」、「經理人」、「寵物」等等。
首先,坂口渚沙企上前,倉野尾成美就想渚沙做自己嘅奶奶,全場爆笑XDDD
小栗有以就想渚沙做自己嘅女朋友,因為覺得渚沙細細粒,好可愛。
但係渚沙就表示有d擔心,因為有以係天然呆,做男朋友有點……
 
 
然後到倉野尾成美企上前,坂口渚沙同小栗有以都想成美做自己嘅經理人。
有以本身想揀女朋友㗎,之後成美即刻話只要細細粒同可愛就能夠成為有以嘅女朋友XDDD
唔講唔知,成美佢好好記性,每次渚沙同有以問之後行程時,成美都可以好詳細咁講俾佢地聽。
 
 
最後到小栗有以企上前,坂口渚沙同倉野尾成美都想有以做自己嘅寵物。
因為有以係天然呆,又會向佢地撒嬌,好可愛,就好似寵物咁XDDD
 
 
再嚟同台下飯們玩遊戲,勝出5位可以上台同三位成員影Cheki(即影即有)!!!
大家玩到超興奮,有巴打無帶帽,即刻有其他巴打借帽俾果隻巴打戴!
好鬼有愛呀!最後果位巴打勝出咗,大家歡呼!好鬼感動呀!!!
 
 
三位成員再唱歌表演,一首唔夠喉,我地不停大嗌「安哥」,得償所願!
當佢地再出嚟時,個頭戴住咗寫成「香港」兩個字嘅頭箍!真係好鬼開心!!!
 
 
 
 
 
見面會告一段落,大家就圍成幾堆,喺到等即將開始嘅握手&簽名會!
 
 
之後大家都排隊等握手同拎簽名Flyer!係握手時,可以同偶像傾計!雖然有限時,但係都好開心!!!
其中有位巴打仲要係今日生日,倉野尾成美即刻同佢講句「お誕生日おめでとう」(生日快樂)!
 
 
 
總結,真係超開心!見偶像本人,這些機會終於屬於我們香港飯的!!!
係等待握手&簽名會期間,同班巴打傾計,原來有唔少人都係「射波」嚟今次活動XDDD
我都俾某位巴打認出我,之後影合照。
無得同AKB48三位成員影合照,所以搵我嚟扮,係咪?(喂!你咩料子?)
喇!巴打,留言還留言,千其唔好貼相!千其唔好貼相!千其唔好貼相!
 
 
好啦!嚟緊,將會有另一位Vlogger Anne同倉野尾成美、坂口渚沙、小栗有以佢地做嘅訪問!
訪問入面,仲有三位成員想對大家講嘅心底說話!
係咪好想知三位成員講咗咩呢?咁大家記得繼續留意Like Japan呀!
 
 
PS.拎燈棒做Furi打call呢d嘢,外行人識條鐵咩?