[不敗日記] 超靈!求戀愛一定要去既日本超靈神社!

我話咗去日本一定要去東京大神宮求戀愛~
等我講下點解我咁想去先~
因為呢,好多J家飯追星追到一直唔拍拖唔結婚,但係人到某個歲數就想有返個家架啦~
咁佢地唯有周圍拜神求簽,希望真命天子快d出現!!!
的確,唔少J家飯去東京大神宮求完戀愛,都真係好快就有戀愛~~~
所以,我都唔執輸!言出必行!我3月1日夜晚到日本,第二朝我就即刻起身狗衝去喇!!!!!
 
 
 
交通都幾方便,因為東京大神宮係飯田橋站附近,行5分鐘左右就到~
我由池袋出發,坐車只係20分鐘就到喇~
 
 
 
車站出口就有地圖,教人點行去神社~~
不過,由於我係路痴,我唔小心去咗靖國神社……
真係「舒咪媽腥」,我唔係有心架(淚)
一去到門口,見到個名,我即刻閃人架喇……相都唔敢影一張呀……
 
 
 
最後,我都係要開返個Google Map,之後到達目的地!!!
真係要提大家一句,一唔識路,企係原位先,開左個Google Map睇清楚先好繼續行。
入到廟,唔除帽都要除副超~禮貌好緊要~
你唔尊重個神,拜黎做咩?係咪?
 
 
 
有巴打同我講話呢到d巫女好靚,我唔覺lo!
仲等我咁期待去睇下有無真人火野麗!!!(怒)
 
 
 
 
入屋叫人,入廟拜神。
拜完神,講咗自己既願望,就梗係即刻求返支簽啦!
求戀愛既就要揀「恋みくじ」,只係100yen咋!
都一場黎到,無理由唔求簽架!?
聽講,呢隻簽好靈架!曾經有日本J家飯去求簽,話佢好快有戀愛,結果,不出4個月就拍拖喇!!!!!
所以,你睇我個樣,好期待會抽到「大吉」,但又好淆底會抽到「凶」~~
 
 
 
日本求簽係將簽桶係咁chok chok chok,就會掉支簽出黎~
我個時,心情超緊張,心跳加速,真係不得了~
我今年有無拖拍,有無得結婚,就睇呢支簽喇!!!!!
 
 
 
見唔見到?見唔見到?俾我抽到「大吉」!係「大吉」!
由於心情太激動,手震震,影得唔太好,「舒咪媽腥」~
支簽大約係話神會幫我實現願望,話同對方會感情堅固,得到幸福快樂~
不過,就叫我唔可以花心~~
睇對象果part,好鬼詳細,星座、血型、年齡差、生肖都有寫!!!
白羊座!?玉森裕太係白羊座架!!!唔通……(妄想中)
但係,支簽叫我留意身邊既人,就算未去到理想對象都好,都係唔錯既人選咁喎~
 
 
 
 
 
知道今年應該唔會有得結婚,心都灰埋……
諗住閃人…一個轉身!射個三分波!丫!唔係!係抬頭一望!
櫻花!!!係櫻花!!!!!
東京大神宮竟然有櫻花睇!我人生第一次睇櫻花,就獻咗俾佢~~
 
 
 
 
櫻花,我見過!我真係見過!
影相之前,我隊個鼻埋去嗅下櫻花係咩味~
但唔知係我鼻殘嗅唔到味定係呢棵櫻花真係無咩香味呢?
等我去睇多幾次櫻花,去嗅多幾次,再話俾大家聽~
 
 
 
睇到櫻花,心情即刻靚哂~
俾我發現有呢舊野,許願木條!!!300yen,買個希望都好丫~對不?
 
 
 
雖然無人收錢,但請將300yen放入箱內~將自己個名、住址、願望寫上木條~
要做個誠實既人,神先會保佑你架嘛~
提供埋筆俾你,可以慢慢寫~仲有本簿仔俾你試墨~真係好細心~
 
 
 
 
 
寫好就放入去收集箱入面,第二朝神社職員就會拎起祈福~
隔離係我既契媽,佢都好努力寫緊願望,不過,佢表示唔願意出鏡~
 
 
 
隔離有個位俾你掛御守,首先買呢隻御守,印有「戀愛成就」個邊就寫上自己個名,掛上去!
淨低另一邊就自己keep住,話咁樣做可以令神記得自己個名,一定保佑自己~
 
 
 
 
發現原來仲有簽求架~ 有人形娃娃樣、花花樣、普通樣、英文版、血型既都有!!!
 
由於呢個太可愛,我忍唔住手抽左個~
 
 
 
 
 
點知一打開就「末吉」……
架仔朋友Y君話過,同一間神社,以求第一支簽作準~
所以……呢支簽,無視無視~~~
留唔留意到我拎住左幾支箭呢?
係求戀愛幸福既情箭黎架,一橙一白為一對,只係1000yen咋!
所以,我除左買俾自己之外,都幫好姊妹買埋~
 
究竟,東京大神宮係咪咁靈呢?
我話俾你聽,真係超靈!!!!!
我係求完既當晚,識到個幾靚仔既架仔A君~
咁都未夠呀!琴晚呢,好日劇既情節發生左係我身上,真係超ドキドキ(心跳)呀!!!!!
真係不得了!不得了!唔敢想像之後會發展成點呀~
琴晚發生得太突然,我都唔知點做好,真係超面紅呀!
我會繼續係呢到同大家報告故事發展(心)
 
希望大家會keep住睇我既[不敗日記]啦~~
 

回覆

新東方不敗的圖片
唔理lu~白羊座又好~雙魚座又好~
靜雞雞話你知~我係新宿撞到佢!開心死我!!!
miffyk的圖片

可唔可以唔求新戀情,而係求戀情永固架??

新東方不敗的圖片

買情箭返屋企,放係睡房!最好對住張床!但位置要高過腰!

miffyk的圖片

一人一支定我自己掛曬兩支???
好有興趣好想去???
不過求籤好似好難咁

新東方不敗的圖片
情箭係一對,掛喺自己間房就ok,唔好拆散佢=0=
求籤堅靈!我7月生日時再去求籤,係同一支簽!!!