[不敗日記]明星都去!想成名就一定要去嘅神社!

之前係[不敗日記]向大家報告緣分遊戲,收到唔少祝福,多謝你地!
記得係第一篇[不敗日記]係向大家介紹求戀愛一定要去東京大神宮!!
(未睇嘅話,就快快睇返啦!http://www.likejapan.com/fuhai1
喇喇喇!咪話我戀愛大過天呀!我都好重視我工作㗎!!!
所以,今次就去神社求事業喇~~
其實,係某人叫我去~(喂!又放閃!?)
 
花園神社
 
位於新宿,由車站東口行唔洗10分鐘就到~
識唔識去歌舞伎町?再行前少少就係㗎喇~~
 
神社嘅出入口,都有個地圖指示,當有災難發生時,附近邊到有避難所。
好啦,我就行樓梯上去喇~
 
當日朝早落咗陣雨,地下好濕,差少少就仆……低。好險~
 
一上到去,咦!?點解好似怪怪地咁嘅!?
原來頭先果個係後門嚟㗎!哈哈哈!
 
好啦!我行行行就行返嚟正前方喇~
好有霸氣呀!!!真係不得了!!!
 
整返張低B自拍照先~
哎呀!我塊面好圓呀!有無絲打有瘦面秘芨傳授俾我呀???
 
好喇!考吓大家先!知唔知行到埋嚟,係點樣拜神嘅呢?
搵三枝香插落去?一手拎哂五條繩係咁搖搖搖?
定係多多益善,放張一萬円落去呢???
 
參拜正確方法︰
1‧ 半彎腰鞠躬
2‧ 拎個5円放落去個箱到,點解係5円呢?係因為「5円」同「有緣」嘅發音相似!
3‧ 拉繩搖搖個鈴鈴
4‧ 90度彎腰鞠躬兩次
5‧ 拍手兩次
6‧ 許願
7‧ 90度彎腰鞠躬
8‧ 最後點頭鞠躬
(神社參拜方法大同小異)
 
又影返張相先~Yeah~~
希望同某人快d結婚!做日本人妻!!!(又話求事業!做咩第一個願望係求戀愛㗎!?)
希望有日我可以喺日本開Live!企喺Live House嘅舞台上自彈自唱!!!
希望多d人支持我!!!
 
一個轉身射個三分波!嘩!唔係!
拜完神諗住轉身走人,就見到身後有得掛繪馬!!!
我發現唔少Bandman都有寫繪馬,都係希望隊Band受歡迎!Good Show!
 
行側邊樓梯落去,就會見到呢個「御神符授與所」!姐係賣御守、繪馬、求簽嘅地方!!!
 
紅色果個!「芸道成就守」!超長lo!比一般御守長一半!咩料!?
不過,咁先顯得霸氣!!!成為1000yen~
我當然有買啦~有助我第二、三個願望實現嘛!hehehe~~~
 
呢d我就無買喇~影張相俾大家睇睇啦~
 
我就係隔離個木箱到抽咗支簽~
呀!記得放100yen落去呀~
一打開,見到「大吉」兩個字,開心到我叫咗出嚟!!!
 
 
以上嘅都係求簽㗎!!!300yen一隻!600yen兩隻!
你無睇錯!係無平到㗎XDDD
 
不過,我都係買咗一對狐狸!男左女右咁擺時,會見到男係寫住「花園」,而女就寫住「神社」!
而簽紙呢~就放咗係底部位置~~
sd咗張相俾某人睇,某人話好可愛喎~(喂!你又放閃!?)
 
之後行過少少,就見到呢個喇~~
係收納大家之前求咗但而家唔想要嘅熊手、御守等等~
我見到有人真係拎大大個熊手放落去~~
 
 
行返出去,就見到細細間嘅稻荷神社,於是就入去拜喇!
都係重覆動作咁去拜神許願~~
 
然後諗住走啦~點知發現入口旁邊……
 
 
なに?何??咩話???
 
芸能浅間神社
 
呢到!先係真‧明星必去求成名嘅神社!!!
見唔見到出面寫咗好多人名呀!?
全部都係藝人嚟㗎!!!!!
 
我即刻行入去拜神許願!!!
又再次講出我嘅願望~(心)
 
聽某人講,嚟拜過嘅藝人,之後都會變得超人氣,都會紅起嚟變成明星㗎!!!
當時我就諗,係咪真係咁堅呀?
估唔到,我拜完之後,返嚟香港,就獲邀請上《恐怖在線》做嘉賓!!!
 
 
希望,我三個願望都早日實現!!!!!
我會繼續努力㗎!!!
 
最近,我開咗個人專頁呀!
我會放吓片上去,自己唱k、彈琴彈結他cover日文歌、日本生活低B片等等~
希望大家Like我個專頁,支持我啦!
歡迎留言、inbox我,講低你想聽我cover邊首日文歌㗎~