[不敗日記]想識Bandman?音樂發燒友必去嘅酒吧!

久違一段日子嘅[不敗日記]又再出現。
之前去親日本,日頭做完嘢,夜晚放工我都會去秋葉原。
唔好誤會!我唔係去執事Cafe呀!我係去酒吧~
有Follow開我Page嘅巴打絲打,應該都知我成日落秋葉原某間酒吧~
 
 
有唔少人都有問我「一個女仔落酒吧唔驚咩?」「日本啲酒吧貴唔貴㗎?」「外國人入唔入得酒吧㗎?」
啲問題真係多到可以出本「十萬個為甚麼」,所以今集[不敗日記]介紹大家去我去開個間酒吧啦!
 
今会えるバンドマンBAR~ACROSS THE BORDER~(現在能見Bandman的BAR~ACROSS THE BORDER~)
 
 
由於店名太長,大家都會將店名簡稱為「アクロス(Akurosu)」或「ATB」。
呢間酒吧位於秋葉原,由車站嘅電氣街出口行5分鐘都唔使就到。
 
ATB同其他酒吧有咩分別?
 
店長同店員都係Bandman嚟!
店長希望客人同Bandman之間可以好似前Visual Band ViViD嘅歌《ACROSS THE BORDER》一樣,
可以跨過Bandman&Fans呢條界線,客人能夠同Bandman見面、傾計。
因為平時只能去睇Live時見到台上嘅Bandman,無咩交流機會可言。
喺店入面,身為Bandman嘅店員會表演彈結他、唱歌等等。
 
 
所以,店鋪擺設都加入咗舞台嘅元素,放有幾支電結他同貝司,牆身貼咗唔少Visual Band嘅Flyer同Bandman嘅簽名。
之前,我都有簽名落牆身到,揀咗簽喺イヴ嘅簽名下面。
 
店長都係Bandman?
店長けん(Ken),原名中村健太,係前Visual Band アンド(And)嘅貝司手。
同前Visual Band ViViD嘅貝司手イヴ(IV)係大親友、好兄弟,イヴ有時都會去ATB搵店長けん㗎。
當初,我都係因為イヴ先去ATB,之後就同班日飯一齊去完簽名會就去ATB玩。
 
有邊個Bandman做店員?
等我介紹一下經常出勤嘅店員啦!
 
憂架(Yuuka)(Ex The♡Valentine. 嘅主音)
 
Yasu(AIRIS嘅貝司手)
 
蓮(Ren)(怪盜少年嘅結他手)
 
Zero(Ex Ash嘅貝司手)
 
唔係日本人,外國人入唔入得去?
 
大把外國人入去玩,由其係鍾意Visual Band嘅音樂發燒友。
我喺ATB都識咗唔少朋友,美國又有法國又有泰國又有。
 
無預約嘅情況下,就咁Walk-in入店?
 
大丈夫!基本上都無問題嘅!
除非你一大班人衝上去,又或者入面開緊Party爆哂場啦!
我去咗三年,都未試過入唔到場。
不過,如果當日有Party嘅話,我都會早少少去~
 
唔識講日文喎,唔知點溝通?
 
店長けん同店員都識基本英文,簡單英文溝通到嘅。
不過,你要知道日本人嘅英文發音同我地係有啲出入。
呢個世界上有樣嘢叫Google Translate,有咩唔識一查個英日翻譯就搞掂。
 
第一次落日本酒吧,唔知叫咩嘢飲好?
普通飲品一杯價錢係700Yen起~
 
如果想同朋友或同店員一邊飲酒一邊傾計交流下音樂心得呢,我建議大家揀3000Yen嘅「飲み放題」,即係任飲。
但要留意,如果飲「テキーラ(Tequila)」或「イエーガー(Jäger)」,係需要額外俾錢,價錢大約係1000Yen一杯。
 
如果想慶祝生日、節日,可以開香檳,價錢為4000Yen、10000Yen、40000Yen不等,視乎香檳而定。
另外,如果想同Bandman一齊飲嘢嘅話,可以點杯請Bandman飲,價錢為700Yen起一杯。
 
不敗推介!我經常飲嘅係?
 
呢杯叫「キミコイ(Kimikoi)」,味道類似草莓奶味,甜甜地,好易入口。
每一次去ATB,我都一定會飲!
後嚟,當我一入ATB坐低時,大家都會自動調一杯「キミコイ」俾我。
 
有無額外收費?
 
要收消費稅,同服務費。
服務費︰18:00~23:00係1000Yen,23:00~05:00係2000Yen。
接受現金及Visa俾錢!
 
如果飲醉咗,行樓梯落去咪好易仆X囉?
 
首先,幢樓太矮,所以係無電梯,要行兩層樓梯上落酒吧。
可能大家都會擔心,飲醉咗,要走個時點算?
大丈夫!大丈夫!因為係會有店員送你落樓嘅,仲要喺你前面倒後行落樓梯。
有店員咁細心睇實你,就唔使擔心自己碌落樓梯啦!
 
注意事項
無論係巴打定絲打都可以去,不過,要年滿21歲!
雖然店員係Bandman,但由於唔使出Show,基本上係唔會化妝,大家要有被素顏雷到嘅心理準備!
店內嚴禁偷拍店員,除非得到店長或店員許可。
 
好多人都問我最愛日本咩地方,我都會答「ATB」。
因為ATB帶俾我有好多好多寶貴嘅回憶。
 
今会えるバンドマンBAR~ACROSS THE BORDER~
營業時間︰星期日至四 18:00~23:00,星期五及六18:00~05:00,節日及慶生Party 21:00~05:00
地址︰東京都千代田区外神田3-2-11遠藤ビル3F
交通︰JR秋葉原站行大約3分鐘, 末広町站行大約5分鐘