[不敗日記]帶你去吉祥寺嘅幽靈居酒屋

 
又係我新東方不敗,今次帶大家嚟到吉祥寺!做咩呢?
相信平時大家都有睇開我寫嘅膽量挑機,有一篇係寫我去吉祥寺嘅井之頭公園靈探!
咁去靈探之前,都要醫吓個肚嘅!
所以,今集不敗日記就帶大家去吉祥寺超出名嘅幽靈居酒屋!!!
何?なに?(@0@")
你無聽錯無睇錯!我真係帶大家去對住d鬼食飯!!!
好!我地一齊GO!GO!GO!
 
都未行到去間鋪,就已經聽到d詭異音樂喇~
一抬頭就見到間鋪門口掛咗個超大白色燈籠m(=w=)m
 
 
一入去,就見到好多骷髗骨嘅嘢放咗係地下,仲有條女屍掛係樓梯位!
條樓梯係超黑!真係超黑!我行落去個時,都好驚會差錯腳碌落去!
仲要行行吓,無啦啦噴風著燈,當堂嚇到個心離一離!
 
之後開門入去啦,雖然有返d燈光,但都係又暗又紅!
抬頭一望,嘩!唔係呀fa!!!
 
 
勁多「人手」係到囉,幾可亂真!
之後望望隔離個廁所位!
 
 
感覺好似入咗去,出唔返嚟咁……
之後視察吓環境…
 
 
硬係覺得佢會突然講嘢咁(汗)
 
女鬼店員就隊咗個「全球獨一無二Like Japan神主牌」俾我=0=
 
 
好在唔係寫我名上去啫…(汗)
我就周圍行,參觀吓,俾放喺正中間嘅棺材吸引著!!!
女鬼店員就同我講話係真‧棺材嚟!話可以俾客人訓入去體驗吓喎!
 
 
我好驚女鬼店員捉我入去,我就勁快返埋位坐!
點知呢,張枱放咗好多道具!
 
 
有個好似法海大師成日拎住果個砵,仲有埋支木棍俾你敲!
女鬼店員話,只要一敲,就可以召喚佢過嚟。
當見到佢時,就舉起隻假手,咁就可以引到佢埋嚟你身邊!
咁好玩,我就梗係要試吓啦!
果然,一敲就召喚到女鬼店員過嚟!
 
由於好肚餓,就叫女鬼店員發板起菜!
 
 
第一道地獄小食︰芝士眼球
不得不佩服日本人嘅細心,竟然連血管都整埋出嚟!!!
其實初時,一見到,我係以為酒心棉花糖,咬落去會有流心!
點知呢,無喎!成粒都係芝士!!!
身為芝士控嘅我就梗係超鍾意食啦!不過,對芝士一般般嘅人嚟講,可能就……
 
 
第二道地獄小食︰稻草人炸薯餅
我以為係就咁成塊炸薯餅啦,點知又唔係喎!
頭同手腳都係唔同嘅嘢食,都幾得意。
而且,放咗係枱一陣先食,但係都仲熱!讚!
 
 
第三道地獄小食︰單腳傘炸魚餅
一見到,就諗起鬼太郎入面個單腳傘!
本身魚餅無咩味,用煙肉做條脷,帶少少咸味,唔錯!
 
就係我食食吓時,無啦啦……
 
 
第四道地獄小食︰鐵板燒肉
店員叔叔倒咗d酒落去,之後點火,突然超大火係我面前!
 
 
我除咗識係咁「嘩!嘩!嘩」之外,隔咗陣先load到係「地獄之火」!
真係無諗過!超Surprise囉!
由於有倒d酒落去再用火燒過,令d肉更香!
 
最後一道地獄小食︰天堂人間地獄炸薯波
女鬼店員無啦啦放低個香爐,叫我地每人揀一支。
咁我揀先,就揀中間,之後叫我地一齊食。
 
 
其實個陣,都唔知發生緊咩事。
到我咬落去,嘩!Wasabi!呀!!!!!(暴走mode)
點解會有Wasabi㗎?我最憎就係Wasabi!呀!!!
係無夾埋!我同Poli同車神都唔知發生咩事!!!
我再重申!真係無夾埋!真係無夾埋!真係無夾埋!
點解?點解我又中伏?我係咪咁黑仔?黑仔成咁???
 
女鬼店員送個「遊麗」紙牌俾我,仲幫我綁喺個頭到!
之後又隊個木框俾我影「遺照」 (=~=")
 
 
影完相,女鬼店員仲幫我著白装束(しろしょうぞく),即係壽衣!
 
 
然後呢,女鬼店員就帶我去棺材度。
好啦!為咗呢份工,我可以去到幾盡?
就係…訓!棺!材!
 
 
大吉利是!百無禁忌!
不過我覺得我扮得隔離個公仔都幾似㗎!哈哈哈!
 
總結︰呢間幽靈居酒屋環境氣氛超正,食物味道亦都唔錯!
充滿驚喜!真係超好玩囉!十分推介大家成班朋友去玩!!!
 
記得繼續支持我呀!等我繼續帶大家周圍去玩!
記得記得Like同Share!否則,我就……
 
 
嚇死你未?問你怕未?哈哈哈
 
「遊麗」 居酒屋
地址︰東京都武藏野市吉祥寺南町1~8~11地中1階
電話︰0422(41)0194
營業︰下午5時至終電前(年中無休)
註︰如有不定期活動,星期六日及公眾假期於下午3時開始營業