[不敗日記]帶你去原宿嘅蛇Cafe

 
今集不敗日記帶大家去原宿嘅Cafe!
去間特別d嘅Cafe,親親大自然嘅感覺好無?
 
嘩!蛇呀!!!
一於就去蛇Cafe啦!唔係得個睇字㗎!仲可以摸㗎!
將條蛇放上身,你敢唔敢?我敢!
我親身示範「如何玩蛇而不失霸氣」
好!我地一齊GOGOGO!
 
店內有超多蛇,放哂係透明箱入面。
每條蛇店員都有自己個名㗎!叫Micheal、Apple,仲有條叫烏冬XDDD
 
你睇吓佢!鬼鬼鼠鼠偷蕃薯!
 
真係好鬼得意㗎ww
呢到係任你揀一條蛇,陪你一齊坐低飲返杯!
 
我左揀右揀,最後揀咗呢條蛇店員!因為佢嘅顏色同我好襯(心)
 
揀好咗,就同店員講,店員就會拎個箱去你枱!
 
係你同條蛇撐枱腳時,有d嘢要注意㗎!
 
第一,千其唔可以打開個膠箱!唔可以放條蛇出嚟!條蛇只係陪坐,唔賣身㗎!唔好手多多摸佢呀!
 
第二,同蛇影相時,唔可以開閃光燈!避免嚇親條蛇!
 
如果想同蛇有親密接觸嘅話,俾580yen就可以喇!
梳化上面有五個大嘅透明箱,都放咗超大條嘅蛇㗎!
當揀好咗蛇之後,就坐定定喺梳化,之後店員就會鋪條毛巾係你大脾。
然後,就拎住條蛇放係你手上,基本上,無限時,任你玩。
 
當然啦,條蛇鍾意爬邊控制唔到。
如果你想做經典動作,得!同店員講!!
 
店員就會幫你擺條蛇落你條頸到,等你影相影餐飽。
好彩嘅話,蛇會親吻你!
放心!店內所有嘅蛇都係無毒嘅!大丈夫!!!
 
玩完之後,如果有興趣想養返條嘅話,都可以俾錢買蛇BB返屋企㗎!
蛇BB大約3至6個月大左右,價錢由幾千yen至4萬yen不等,視乎品種同體型大小而定。
真係想買蛇BB返香港嘅話,係需要向漁農自然護理署申請特別許可證㗎!
 
想買d嘢做紀念?大丈夫!店內大把紀念品俾你揀!
有年曆卡、蛇參考書、蛇皮製成品,例如好似書簽咁嘅御守、吊墜,完整一條蛇皮都有得買!!
 
我就揀咗蛇皮御守,細細張,成張書簽咁。
聽講,放喺銀包,可以增加財運㗎!
我就梗係即刻買完放入銀包啦!哈哈哈!
 
嚟緊暑假,去東京玩嘅話,都可以上去玩吓蛇呀!
喺原宿站行五分鐘左右就到,玩完蛇先去竹下通血拼!!!
 
東京スネークセンター( cafe & snake – Tokyo Snake Center)
地址︰東京都渋谷区神宮前6-5-6 サンポウ綜合ビル8F
電話︰03-6427-9912
營業時間︰11:00~20:00(逢星期二休息)
 
Tags: