【一步一驚心】穿越奈良歷史木吊橋

呢條位於奈良縣嘅吊橋「谷瀬の吊り橋」係日本最長嘅民用吊橋,全長297.7米,高54米,建於昭和29年,到而家已經有成60幾年歷史。因為前後都被山景環繞,向下望又有河川景色,所以度度都係影相位,超靚!不過影還影,都要注意安全,行上去真係會有少少離心感,一步一驚心。
 
 
行呢條橋都幾需要平衡力,由於條橋有成50幾米高,行上去之後個人會feel到浮浮地,不過適應咗之後會好好多,有愄高症的話真係要諗清楚先好踏出第一步,如果唔係行到中間先嚟後悔就要頂硬上行埋落去......
 
 
條橋都幾窄,得80cm闊,兩個人平排一齊行都幾迫,加埋勁薄嘅木地板,成條橋一路行一路搖,好不安。雖條橋嘅兩側都有位可以扶住,但扶咗之後個姿勢會令到你好自然咁成日向下望,好似越扶越驚。
 
而通常喺呢啲時候,就會有幾個當地人以從容嘅態度爬你頭,仲要回頭對你微微一笑,好似同你講緊「加油行埋佢啦你!」。當地日本人可以從容到咁完全可以理解,佢地幾乎日日都會用到呢條橋,緊係行到慣哂啦!
 
 
因為條吊橋都已經有返咁上下歷史,負荷唔到太重嘅重量,所以會限住同時最多只可以有20個人喺條橋上面,出入口更加有工作人員駐守,確保大家嘅安全。
 
 
如果大家有時間的話,極度推介大家喺度過返晚!因為呢度嘅夜景比日景更壯觀更迷人!喺每晚嘅5點到8點,呢度會有點燈儀式,由於附近都冇咩光污染,顯得條橋好靚好突出,好似全世界得返呢條橋咁。8點之後呢度就會熄燈,一瞬間四周會陷入一片漆黑,滿天都係星星真係好靚!
 
谷瀬の吊り橋周邊地圖
 
如果諗住睇埋夜景同過返晚夜先走可以去附近嘅露營場「心のふるさと つり橋の里キャンプ場」,嗰度有屋仔可以租,不過就冇高床軟枕,志在有個地方可以坐低睇吓夜景,好適合情侶或者三五知己傾計傾通宵。
 
三人用屋仔。
 
營地有廁所同浴室,不過如果個人唔係太污糟可以出返市區返酒店先沖。
 
喺營地以第二個角度望去條橋度又係另一種感覺,好特別。
 
心のふるさと つり橋の里キャンプ場
地址:奈良県吉野郡十津川村谷瀬一番地
電話:0746-68-0626
營業時間:check-in 10:00~21:00、check-out 07:00~22:00
休息:10月~3月