一定無中伏既「燒肉店」!

大家去日本都一定食過燒肉,特別係當你喺新宿入面,基本上寫住「焼き肉」嘅店舖係多到數唔晒。而今次想推介比大家嘅呢間叫「叙々苑

首先如果你係諗住食又平又抵嘅嘢嘅,咁以下嘅內容都唔使再睇落去啦。但相反如果你唔介意俾多少少錢想食好嘢,又搵一啲CP値高既燒肉店,呢間絕對係信心推介。
今次嘅旅程特登去咗兩間唔同分店食,因為就算係新宿入面,都有行兩種唔同grade嘅分店。人均洗費約6,000-9,000円左右喇。
 
重點推介係:五花肉片,生牛肉,上等五花肉,壺漬橫膈膜,龍蝦尾
 
 
雖然中文Menu上面寫「五花肉片」,但日文係「切り落とし」其實意思係切剩出嚟嘅頭頭尾尾五花肉,千祈唔好以為切剩出嚟就一定無好嘢就大錯特錯啦!呢味肉係仲好食個叫普通五花肉,因為有啲肉脂肪比例非常好,估計係由上等五花肉剩咗出嚟。但最重要個價錢係普通五花肉嘅75折,CP値超高。
 
「生牛肉」,配埋生雪梨條同炸蒜片,絕!
 
「壺漬橫膈膜」睇落去似三角形嘅牛柳粒,但因為已經醃浸過,所以燒完特別juicy,有咬口。
盡量先揀壺底下既先燒,因為會浸得均啲。裏便仲會有兩隻蝦添~
 
「龍蝦尾」,已經起肉,建議燒到半熟時可以1開2咁燒,一囗一啖蝦肉鮮到痺。
 
麻麻地既就係:雜菇,同蝦
通常最多香港人會去既係喺新宿中心Hotel Gracery對面棟大廈9樓嗰間,而當日所見有接近50%嘅枱係香港或中國客人,地方空間感比較細,人流多,所以service也普普通通,感覺比較似旺角嘅燒肉鋪。
 
強烈建議大家去行高檔路線嘅「游玄亭」叙々苑,其實都係喺酒店嘅後邊行一分鐘路程。呢度係佢哋獨立一幢既集團大廈,一入大門已經有個着和服嘅女店員準備招呼你,而每張枱嘅空間比起9樓大一倍半左右,不單止地方舒適左,店員仲係慢慢噤serve你,跪喺度同你落單,做到好傳統日本食肆既服務水平,呢種都叫做一個旅行嘅享受。而個人感覺肉嘅質素都明顯比較好!
 
咁你就以為乜都正左所以收費會貴番?NO way! 比較過佢嘅menu後,驚嚇地發覺原來每樣菜式只係貴左100円左右咋!
(不過由於呢間店行高檔路線,所以係唔會有「五花肉片」提供嘅)
CP値相當高嘅燒肉店,絕對值得一試!
 
但「游玄亭」呢間一係6點就去,如果唔係之後walk-in,基本上有排等,因為呢間主要係做預約嘅客人。