【‪‎Like Japan 放送室】專訪日本拉麵文化達人-「拉麵陳」Meter Chan

 
拉麵係日本嘅國民美食代表之一,喺香港都好受歡迎。各式各樣嘅拉麵、配上唔同嘅湯底、唔同嘅材料、唔同嘅食法,簡直令拉麵迷難以自拔。沾麵亦都係拉麵嘅其中一種,食法同一般拉麵唔同,亦都係近年先係香港冒起。人稱「拉麵陳」嘅Meter Chan當年就將著名日本沾麵店引入香港引起話題,亦打造咗好幾間成功嘅日本食店。今集《Like Japan 放送室》我哋就請嚟Meter同我哋講下,將日本最地道嘅美味帶嚟香港嘅故事。
 
選址特別 一切因緣分安排
 
如果同人講西九龍中心有間食沾麵店好出名,大家可能都聽過,但實際位置係邊...真係唔搵個都未必搵到。點解會揀喺啲格仔鋪隔離開沾麵店?唔驚做唔到生意嘅咩?原來一切靠緣分。當年Meter嚟睇舖位覺得food court唔適合做沾麵,落一層行行下就見到而家個鋪位,啱啱好間酒樓走咗有個吉位,Meter就選擇咗呢度開隱家,仲話因為對隱家嘅味道有信心,所以唔怕無生意喎!Meter仲話,做一件事,或者開一間鋪頭,最緊要係對佢有熱誠,咁先可以堅持做好件事,同埋會enjoy做。而家已經身為幾間食店老闆嘅佢,雖然日日都好忙,但就好樂於做自己鍾意做嘅事,好充實!
 
港日文化之差異 造成港人師傅和日本人師傅的分別
 
到底將一樣異地嘅料理引入香港時遇到啲咩難處呢?Meter就話一開始沾麵係香港未普及,有啲食客真係唔識食,會將碗湯直接倒落碗麵到,成件事錯晒之餘碗麵又變得好難食,所以Meter開店頭三個月都係喺舖頭入面觀察同教育食客,而且張貼返正確食沾麵嘅方法。
 
日本料理職人對料理嘅個份熱誠同認真係日本料理深受食客歡迎嘅原因之一。係香港開拉麵店有冇特別將呢種文化帶來香港呢?Meter就讚其實香港人師傅一樣咁叻,而且香港人出名做嘢快又有效率。不過呢招未必係香港行得通。有時候一啲師傅可能因為貪快省略步驟,但每個步驟都省略少少嘅時候碗麵就會唔同咗。所以佢都好注重教育員工要有耐心同埋認真。當日去拜訪時,師傅招呼非常好,仲教我食完麵要加湯飲先好味,最後仲推薦埋我有咩其他沾麵好食。有時候呢份簡單嘅人情味,係食客心目中都會留下深刻嘅印象。
 
係日本生活咗15年,問到Meter最鐘意食乜,佢就話係拉麵。因為拉麵係1000yen以下可以有最多變化嘅料理,又濃味又飽肚,非常適合學生哥去食。當然啦,身為香港人嘅佢都會掛住香港嘅美食。身在異地最想念嘅,Meter就話係燒鵝同焗豬扒飯。唔怪得啦!原來Meter好鍾意食番茄味嘅嘢,而佢當初都係因為食咗隱家嘅番茄味沾麵先決定將佢引入香港架!
 
 
睇埋片,見到最後我都忍唔住點咗份番茄味嘅沾麵嚟食。其實我好少喺香港食沾麵,因為香港拉麵店林立,去到可能會揀普通嘅拉麵店先。隨著香港引入越來越多日本拉麵店,我問Meter點睇依家香港拉麵業嘅發展。佢就好豁達,覺得同行有競爭有進步,係非常之好嘅事。最好當然就係造福香港市民,有更多更地道嘅選擇。
 
身在異地 最重要融入及接納當地文化 
 
最後,Meter引用喺日本分類垃圾過程嚟形容香港人去到日本生活要融入當地文化嘅困難。習慣快同埋唔做麻煩嘢嘅香港人要仔細分類垃圾仲要儲起啲垃圾等到啱嘅日子先拎出去回收,真係幾難適應。不過,去到其他國家遵守返當地嘅文化係非常應該而且重要嘅事情。如果我哋因為自己係香港人唔係本地人就唔遵守呢啲規則,咁樣同我哋成日講嘅強國人文化有咩分別喎。所以嚟緊會去日本生活嘅你,要好好記住呢點啊~

回覆

Anne的圖片
值得一試!至少蕃茄湯底我是真心推~記得吃完麵叫師傅加湯底,會變得神奇地好味!