【‪‎Like Japan 放送室】專訪旅遊達人-項明生 James Hong

【‪‎Like Japan 放送室】專訪旅遊達人-項明生 James Hong

 
James 項明生,如果你係近年先聽過呢個名,你(或屋企人)可能有睇佢喺J5播嘅旅遊節目《日韓台櫻花三角戀》、或者知道佢係以作家身份出過多本遊記嘅「旅遊達人」。如果你係早幾年就聽過呢個名嘅話,你亦可能會知道佢以前喺Sony做咗15年,由一個市場部推廣主任一步一步升至全球第一個華人董事。

 

日本企業打工仔生存之道
 

【‪‎Like Japan 放送室】專訪旅遊達人-項明生 James Hong

問到James係如何喺日本公司由基層攀升做到高層,佢就好坦然話喺日本公司嘅生存之道就係要「帶住個面具」。因為日本人係唔會喺大眾前表現自己心底裏嘅意見同說話,所以就算一班人開會都唔會有反對聲音,亦都唔會表露不同意或不悅面色。
 
除此之外,日本公司真係好著重「年功序列」,即係論輩份排凳仔。如果你係唔鍾意follow老seafood、或者係好直腸直肚、鍾意挑戰制度嘅年青人嘅話,James就話咁樣真係可能唔係太適合喺日本公司做嘢喇。

 

Pokemon Go:無人估到佢會開大!
 
作為前Sony董事,又係專門負責家庭遊戲機嘅巿場推廣,仲以為James好鍾意打機啦,但原來近年嘅佢已經好少打機,手提電話上面最多嘅apps反而係翻譯語言等apps,幫佢學外語咁話喎。咁唔知James覺得一隻好玩、大賣嘅遊戲需要啲咩元素先會成為神作呢?James就話佢以前都以為有一條方程式,但呢排大hit嘅Pokemon Go話俾佢知係無㗎!Pokemon Go用緊日本5、6年前已經用緊嘅AR技術,講技術輸VR一大截,但又偏偏大熱瘋魔全世界嘅玩家。所以James都覺得一隻遊戲要成功,故事同遊戲性係勝於技術呢。

 

越容易去嘅地方 遊記越難寫
【‪‎Like Japan 放送室】專訪旅遊達人-項明生 James Hong
講到日本,James其實都係專家!做Sony之前係做一樣係日本公司嘅富士菲林,即係加埋喺日本公司做過20年架喇。加上讀大學嘅時候都有讀日文同研究日本文化,佢話自己去日本已經超過100次添呀!不過反而因為咁,佢覺得寫日本遊記其實難。因為多人寫同研究日本,所以佢要努力搜集日本鮮為人知嘅一面、或者從日本人角度出發。
 
James去日本旅行鍾意睇埋歷史同去啲鄉郊地方,今次呢本遊記佢就選址東北,唔單止可以唔駛同人迫咁賞櫻、任影唔嬲之外,仲同「人肉字典」才子陶傑一齊,邊探討日本歷史文化邊欣賞郊邊景色添!佢最推薦大家去建於民國初期、一個和式同洋式二合為一銀山溫泉,仲可以著住大正時期嘅大正浪漫風和服(用傳統和服唔同架)遊走呢個咁靚嘅地方。
 
如果叫James推介日遊心得,佢話都係鍾意同推薦大家去日本嘅「靈魂」京都。如果真係想了解日本人嘅精神,可以去多幾次京都,仲可以搵到宋朝嘅歷史(而隔離嘅奈良就可以睇多啲唐朝嘅歷史)。而家香港人去東京大阪去到爛,James都建議大家去多啲周邊小鎮發掘多啲自己未去過未睇過嘅地方呢。今次James嘅新書《人生若只如花見》專講去東北賞櫻同研究日本歷史文化,會係書展推出,星期日(7月24)下晝4點喺大眾嘅攤位會有簽書活動添!到時就可以親口問吓佢遊列鄉郊小鎮嘅心得啦!
 
【‪‎Like Japan 放送室】專訪旅遊達人-項明生 James Hong
 
特別鳴謝:場地提供 — 鐵板燒雪舟