[冇雷公咁遠系列VOL.1!!]
每次去日本，唔係東京就係京阪神，最遠都係北陸，有時會唔會覺得有少少悶﹖如果你係有咁嘅諗法，不妨參考下[冇雷公咁遠系列!!]嘅介紹，或者你會得到新嘅答案啊！
今次要介紹嘅地方係位於東北嘅岩手縣(話明冇雷公咁遠嘛～)。以往去東北地區旅行，除非係自己租車，否則基本就只有坐JR去，不過以前由於只有最貴嘅「JR全國PASS」(大人7日2：9110日圓，14日：46390日圓，21日：59350日圓，兒童半價)係包東北地區，重要連續7日，真係又貴又唔方便。不過自從今年出咗「JR東日本鐵路周遊券」(海外售價 大人19000日圓，兒童 9500日圓)之後，換證後14日內可任選5日任坐JR，令到行程安排彈性咗好多，真係超級方便，而且東京(上野)去青森單程已經去咗16940日圓，隨時行程第一日已經回本。
JR東日本鐵路周遊券
好！ 入正題！(而家先入!?) 今次介紹嘅就係位於東北岩手縣岩泉町嘅鐘乳洞「龍泉洞」，而與山口縣美禰市的秋芳洞及高知縣香美市的龍河洞並列日本三大鐘乳洞，秋芳洞排第一，龍泉洞則排第二。
洞內長度僅已知部分就已經有 3600多米。並形成洞內嘅地下河，同幾個好深嘅地底湖，不過由於1968年發生探索時嘅潛水意外，之後探索工作一直停擺到而家。而家開放嘅路段大約只有1200米左右，但已經足夠大家行接近兩小時。如果係打算即日來回岩手嘅朋友，時間仲可能有啲趕添。
唔好諗住呢啲咁遠嘅地方，特別係地震過後。其實意外有唔少遊客呢，當中仲有歐美同台灣人呢。其實就使用公共交通工具嘅朋友嚟講，一般係有兩種：沿東北新幹線喺岩手留一日甚至即日走嘅朋友，同埋連三陸海岸一帶打包玩兩至三日嘅朋友。前者一般會乘坐東北巴士，後者則多用三陸鐵路。
意料之外其實絕大部分人都係由三陸海岸過去，坐巴士嘅兩隻手數得晒，如圖中
見得到嘅人頭都係小編認識的。
車程時間長達2小時，所以中途會喺休息站「三田貝分校」(佢曾經真係學校)休息
貌似好出名嘅地區產品，有水有乳酸飲品，味道就……飲唔出分別！(被巴)
喺東北，戀人聖地隨時多過便利店
成人1000日圓，中＋小學生半價，入場係包埋講探索史嘅龍泉新洞。不過由於新洞唔俾影相，有興趣嘅朋友請親
自到場參觀！
唔講唔知，原來龍泉洞入面嘅泉水都係藍藍地又特別清澈(好矛盾，但真係事實)，咁係因為地下水經過石灰同腐植質過濾，同時飽含礦物，真係靚都震。特別係3個地底湖，連幾十米深嘅湖連湖地形同岩石都可以睇得清清楚楚，非常推薦要親眼見證。
據說除咗紅布外其他都係天然形成
深90米嘅地底湖仍然清澈見底
不得不讚燈光效果更勝秋芳洞
由於龍泉洞溫度低，所以也有存放酒嘅地方。
一出出口就見到岩泉町觀光地圖，意外地岩泉町同三陸海岸其實好多地方去
前往方法﹕
方法1
從「盛岡站」坐東北巴士前往「龍泉洞前」
所需時間﹕2小時14分(單程)
車資：往龍泉洞來回車資5320日圓(單程2660日圓，所謂來回就係買兩張單程票[汗])
※持有JR pass全國版可免費乘坐，而持有JR東日本鐵路周遊券就唔該乖乖買飛啦。
※適合共在岩手停留一日遊嘅朋友
方法２
乘坐三陸電車，於小本站落車，再轉乘巴士前往龍泉洞(巴士車程為24分鐘)
小本站往龍泉洞班次
8:40 10:00 11:50 14:24 15:50 17:15
龍泉洞往小本站班次
8:11 10:50 11:54 12:40 14:35 14:53 16:54 17:26
※適合配搭三陸海岸、淨土之濱、田野畑站北山崎展望台、坐懷舊列車嘅朋友，就要坐三陸電車！
留意!! 由於今年較早前受到颱風影響，所以龍泉洞會修整直至2017年3月重開!!(不過如果係打算3月去東北玩嘅背包客，其實而家要PLAN行程啦……)
龍泉洞＋龍泉新洞
地址﹕岩手縣下閉伊郡岩泉町岩泉字神成1番地1
電話﹕0194-22-2566（龍泉洞事務所）
網址﹕http://iwate-ryusendo.jp/
定休日：無休、惟視乎天氣可能臨時休業，另龍泉洞因受早前10號台風影響而需要整修，現預定於2017年3月重開，出發前請先於官方網頁確認
開放時間﹕08:30-17:00pm（5月至9月 08:30-18:00）
收費﹕高中生或以上 1000 日圓，中、小學生 500 日圓
ＷＨＡＴ ＩＳ [冇雷公咁遠系列!!]！？
每次去日本，唔係東京就係京阪神，有時會唔會覺得有少少悶﹖ [冇雷公咁遠系列!!]專門介紹遠離以上地方嘅地方！ 無論你係心思思想出遠行，定只係眼睛想旅行，入嚟之後可能會得到新嘅答案啊！
About Post Author
